“९३.६९% विजयगर्जना! बारावीच्या निकालात रायगड पुन्हा अव्वल; पण खालापूर का थांबला मागे?”

सत्यमेव जयते न्यूज डॉट कॉम

अलिबाग  |

महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी २०२६ मध्ये घेण्यात आलेल्या बारावी परीक्षेचा निकाल शनिवारी (ता.२) ऑनलाईन जाहीर झाला. रायगड जिल्ह्याने पुन्हा एकदा आपली यशस्वी परंपरा कायम राखत मुंबई विभागात अव्वल स्थान पटकावले आहे. यंदा जिल्ह्याचा एकूण निकाल ९३.६९ टक्के लागला असून, हा आकडा केवळ यशाची नोंद नाही तर जिल्ह्यातील शिक्षणाच्या बळाची साक्ष देणारा ठरला आहे. मात्र या चमकदार यशामागे तालुकानिहाय असलेली मोठी तफावतही स्पष्टपणे समोर आली आहे.
बारावी परीक्षेसाठी रायगड जिल्ह्यातून ३० हजार ५५८ विद्यार्थ्यांनी अर्ज केला होता. त्यापैकी ३० हजार ४७० विद्यार्थी प्रत्यक्ष परीक्षेला बसले आणि त्यातील तब्बल २८ हजार ५४९ विद्यार्थी उत्तीर्ण झाले. जिल्ह्यात श्रीवर्धन तालुक्याने ९७.११ टक्के निकालासह अव्वल स्थान पटकावले, तर खालापूर तालुका केवळ ८५.०२ टक्क्यांवर थांबला. म्हणजेच जिल्ह्यातील काही भाग वेगाने पुढे जात असताना काही तालुके अजूनही मागे असल्याचे चित्र या निकालातून स्पष्ट झाले आहे.
यंदाही मुलींनी आपले वर्चस्व कायम ठेवत मुलांपेक्षा सरस कामगिरी केली आहे. एकूण १४ हजार ७४८ मुली उत्तीर्ण झाल्या असून १३ हजार ८०१ मुले पास झाली आहेत. त्यामुळे रायगडमध्ये शिक्षणाच्या क्षेत्रात मुलींचा दबदबा कायम असल्याचे पुन्हा अधोरेखित झाले आहे.
शाखानिहाय निकाल पाहता विज्ञान शाखेने ९८.५७ टक्के निकालासह आघाडी घेतली असून वाणिज्य शाखेचा निकाल ९१.२९ टक्के लागला आहे. तंत्रविज्ञान शाखा ९२.४० टक्क्यांसह स्थिर कामगिरी करत असताना किमान कौशल्य शाखेचा निकाल ८९.५९ टक्के राहिला आहे. मात्र कला शाखा ८६.०३ टक्क्यांवर थांबल्याने या शाखेकडे विशेष लक्ष देण्याची गरज अधोरेखित झाली आहे.
तालुकानिहाय निकालात श्रीवर्धन (९७.११), तळा (९६.६९), कर्जत व म्हसळा (९६.३१) यांनी आघाडी घेतली असून अलिबाग (९५.३९), पनवेल (९४.७३), रोहा (९४.२९), उरण (९४.०३) आणि पेण (९३.९४) यांनी स्थिर कामगिरी नोंदवली आहे. तर सुधागड (८८.४४), मुरूड (८८.४६) आणि खालापूर (८५.०२) हे तालुके मागे राहिल्याचे दिसून आले आहे. त्यामुळे जिल्ह्यातील शिक्षणाच्या गुणवत्तेत असलेली असमानता पुन्हा एकदा समोर आली आहे.
निकाल जाहीर होताच यशस्वी विद्यार्थ्यांनी जल्लोष साजरा केला. रायगड जिल्हा परिषदेचे अध्यक्ष मंगेश वाकडीकर, उपाध्यक्ष मधुकर पाटील, शिक्षण सभापती चंद्रकांत कळंबे, मुख्य कार्यकारी अधिकारी नेहा भोसले आणि शिक्षणाधिकारी (माध्यमिक) महारुद्र नाळे यांनी सर्व यशस्वी विद्यार्थ्यांचे अभिनंदन करून त्यांच्या पुढील वाटचालीस शुभेच्छा दिल्या. मात्र या यशासोबतच मागे राहिलेल्या तालुक्यांकडे लक्ष देणे आणि शिक्षणातील तफावत कमी करणे हीच आता खरी गरज असल्याचे या निकालाने अधोरेखित केले आहे.