“रायगडचा पॉवर मॅप बदलतोय; महाराष्ट्र चेंबर ऑफ कॉमर्सच्या गव्हर्निंग कौन्सिलवर आशिष भट- विजय राणेंची वर्णी”

रायगडचा राजकीय आणि सामाजिक प्रभाव आता केवळ जिल्ह्यापुरता मर्यादित राहिलेला नसून तो राज्याच्या धोरणात्मक व्यासपीठांपर्यंत पोहोचू लागल्याचे चित्र दिसू लागले आहे. महाराष्ट्र चेंबर ऑफ कॉमर्स, इंडस्ट्री अँड अॅग्रीकल्चरच्या गव्हर्निंग कौन्सिलवर रायगडचे आशिष चंद्रकांत भट आणि विजय काशीराम राणे यांची झालेली बिनविरोध निवड ही त्याच बदलत्या वास्तवाची नांदी मानली जात आहे. या निवडीमुळे रायगडचा ‘पॉवर मॅप’ बदलत असल्याची चर्चा विविध क्षेत्रांत सुरू झाली आहे.

महाराष्ट्रातील उद्योग, व्यापार, कृषी आणि सेवा क्षेत्रातील महत्त्वाच्या धोरणात्मक चर्चांमध्ये भूमिका बजावणाऱ्या महाराष्ट्र चेंबर ऑफ कॉमर्सच्या गव्हर्निंग कौन्सिलवर स्थान मिळणे हे प्रतिष्ठेचे मानले जाते. अशा व्यासपीठावर रायगडमधील दोन वेगवेगळ्या क्षेत्रांतील नेतृत्वाला संधी मिळाल्याने जिल्ह्याच्या वाढत्या प्रभावाची नोंद राज्यस्तरावर घेतली जात असल्याचे मानले जात आहे.

आशिष भट हे राजकारण, समाजकारण, क्रीडा आणि सांस्कृतिक क्षेत्रातील सक्रिय नेतृत्व म्हणून ओळखले जातात. राष्ट्रवादी काँग्रेसचे रायगड जिल्हा चिटणीस तसेच जिल्हा शांतता समितीचे सदस्य म्हणून त्यांनी विविध स्तरांवर प्रभावी काम केले आहे. जनसामान्यांच्या प्रश्नांसाठी सातत्याने पाठपुरावा, प्रशासनाशी समन्वय आणि व्यापक जनसंपर्क यामुळे त्यांनी स्वतःची वेगळी ओळख निर्माण केली आहे. राज्यस्तरीय संस्थेवरील त्यांची निवड ही त्यांच्या दीर्घकालीन कार्याची आणि नेतृत्वक्षमतेची दखल मानली जात आहे.

दुसरीकडे विजय राणे यांनी शिक्षण क्षेत्रात उल्लेखनीय कार्य उभे केले आहे. साईश शैक्षणिक संस्थेचे संस्थापक-अध्यक्ष म्हणून त्यांनी ग्रामीण भागातील विद्यार्थ्यांसाठी शिक्षणाच्या नव्या संधी उपलब्ध करून दिल्या आहेत. शिक्षण, कौशल्य विकास आणि युवकांना सक्षम बनविण्याच्या त्यांच्या प्रयत्नांमुळे त्यांचे नाव जिल्ह्याच्या सीमांपलीकडे पोहोचले आहे. मराठा चेंबर ऑफ कॉमर्स तसेच सॅटर्डे क्लबमधील त्यांच्या सहभागामुळे उद्योग आणि शिक्षण यांच्यातील दुवा अधिक मजबूत झाला आहे.

या निवडीच्या पार्श्वभूमीवर आशिष भट आणि विजय राणे यांनी रायगडच्या हिताचे प्रश्न राज्यस्तरावर प्रभावीपणे मांडण्याचा निर्धार व्यक्त केला आहे. उद्योग, रोजगारनिर्मिती, उद्योजकता, कौशल्य विकास, शिक्षण आणि स्थानिक विकासाशी संबंधित मुद्द्यांना प्राधान्य देत रायगडचा आवाज अधिक सक्षमपणे पोहोचविण्यासाठी प्रयत्न केले जातील, असे त्यांनी स्पष्ट केले. रायगड हा औद्योगिक, शैक्षणिक, कृषी आणि पर्यटन क्षेत्रात मोठी क्षमता असलेला जिल्हा असून या सर्व क्षेत्रांच्या विकासासाठी राज्यस्तरावर सकारात्मक पाठपुरावा करण्यावर भर दिला जाईल, असेही त्यांनी नमूद केले.

याचबरोबर महाराष्ट्र चेंबर ऑफ कॉमर्सचे अध्यक्ष रवींद्र माणगावे यांनी राबविलेल्या “गाव तिथे उद्योजक” या महत्त्वाकांक्षी संकल्पनेचा विस्तार रायगड जिल्ह्यात करण्याचा मानसही त्यांनी व्यक्त केला. ग्रामीण भागातील युवक, महिला आणि नवउद्योजकांना व्यवसायाच्या संधी उपलब्ध करून देणे, स्थानिक संसाधनांवर आधारित उद्योगांना चालना देणे आणि रोजगारनिर्मिती वाढविणे या उद्देशाने ही संकल्पना रायगडमध्ये प्रभावीपणे राबविण्यासाठी प्रयत्न केले जातील, असे भट आणि राणे यांनी सांगितले.

विशेष म्हणजे, भट आणि राणे हे दोन वेगवेगळ्या क्षेत्रांचे प्रतिनिधित्व करतात. एकीकडे राजकीय-सामाजिक क्षेत्रातील सक्रिय नेतृत्व तर दुसरीकडे शिक्षण आणि कौशल्य विकास क्षेत्रातील प्रभावी कार्य. या दोन्ही प्रवाहांना राज्यातील सर्वोच्च उद्योग-व्यापार व्यासपीठावर स्थान मिळणे ही रायगडच्या बदलत्या सामर्थ्याची नोंद मानली जात आहे.

रायगड हा औद्योगिक गुंतवणूक, बंदरे, पर्यटन, कृषी आणि शिक्षण क्षेत्रात मोठी क्षमता असलेला जिल्हा आहे. मात्र या क्षमता आणि स्थानिक प्रश्नांना राज्यस्तरावरील चर्चांमध्ये प्रभावीपणे मांडण्यासाठी सक्षम प्रतिनिधित्वाची गरज वारंवार व्यक्त होत होती. भट आणि राणे यांच्या निवडीमुळे रायगडच्या विकासाशी संबंधित मुद्द्यांना अधिक बळ मिळेल, अशी अपेक्षा व्यक्त केली जात आहे.

दरम्यान, राजकीय, सामाजिक, शैक्षणिक, औद्योगिक आणि व्यावसायिक क्षेत्रातील मान्यवरांनी दोघांचे अभिनंदन केले असून ही निवड केवळ वैयक्तिक यश नसून रायगडच्या वाढत्या प्रभावाची राज्यस्तरावर झालेली दखल असल्याची भावना व्यक्त केली आहे. बदलत्या काळात रायगडचा ‘पॉवर मॅप’ नव्याने रेखाटला जात असताना भट आणि राणे यांची गव्हर्निंग कौन्सिलवरील निवड हा त्या प्रवासातील महत्त्वाचा टप्पा मानला जात आहे.