नातवाचा चेहरा दिसला… आजीचं जगच बदललं!” अंधारातून उजेडाकडे… एका चष्म्याची गोष्ट!”

किल्ले रायगडच्या पायथ्याशी असलेल्या छत्री निजामपूर येथे आयोजित नेत्र तपासणी शिबिर हे केवळ आरोग्य सेवा देणारे उपक्रम नव्हते, तर अनेकांच्या आयुष्यात ‘दृष्टी’सोबतच नव्या आशेचा प्रकाश घेऊन आले. यशवंत फाऊंडेशन आणि लक्ष्मी चॅरिटेबल ट्रस्ट यांच्या संयुक्त विद्यमाने झालेल्या या शिबिरात ८२ नागरिकांची तपासणी करण्यात आली आणि अनेकांना मोफत चष्म्यांचे वाटप करण्यात आले. विशेष म्हणजे, चष्मा मिळाल्यानंतर “आता मला माझ्या नातवाचा चेहरा स्पष्ट दिसतोय,” असे सांगणाऱ्या एका वृद्ध महिलेच्या शब्दांत या उपक्रमाचा खरा परिणाम दिसून आला.

या शिबिरातील सर्वात धक्कादायक बाब म्हणजे तब्बल २५ रुग्णांना मोतीबिंदू शस्त्रक्रियेसाठी पाठवावे लागले. म्हणजेच हे सर्व रुग्ण अंधत्वाच्या उंबरठ्यावर होते. वेळेत तपासणी झाली नसती, तर त्यांची दृष्टी कायमची जाऊ शकली असती. हा आकडा ग्रामीण भागातील आरोग्य व्यवस्थेतील दुर्लक्षाचे वास्तव अधोरेखित करणारा आहे.

ग्रामीण आणि आदिवासी भागात डोळ्यांची काळजी ही अजूनही प्राथमिकतेत नाही, मात्र दृष्टी ही केवळ गरज नाही तर शिक्षण, रोजगार आणि जीवनमानाशी थेट संबंधित असलेला मूलभूत हक्क आहे. या पार्श्वभूमीवर या उपक्रमाने “आरोग्य सेवा ही सुविधा नसून हक्क आहे” हा ठाम संदेश दिला. शिबिरात डॉ. वैष्णवी गिरी यांनी डोळ्यांची निगा राखण्याबाबत मार्गदर्शन केले, तर जयवंत गायकवाड यांनी स्वच्छता व आरोग्य याबाबत जनजागृती केली.

या उपक्रमामुळे अनेकांना तात्पुरता दिलासा मिळाला असला, तरी खरा प्रश्न अजूनही कायम आहे. ग्रामीण भागातील प्रत्येक गावात अशीच परिस्थिती असेल तर आरोग्य सेवा पोहोचवण्याची जबाबदारी नेमकी कोणाची? प्रत्येक वेळी स्वयंसेवी संस्था पुढे येणार का? छत्री निजामपूरमधील हे शिबिर केवळ एक सेवा नसून ‘दृष्टीच्या हक्कासाठी’ सुरू झालेले एक महत्त्वाचे जागरण असल्याचे स्पष्ट होत आहे.

……