राज्यपालांच्या खांद्यावर बंदूक?; विजयला रोखण्यासाठी भाजपचा सत्ता गेम, १०८ आमदारांच्या राजीनामा इशाऱ्याने खळबळ

तामिळनाडुत भाजपची थेट ताकद मर्यादित असली तरी सत्तेच्या समीकरणांवर नियंत्रण ठेवण्यासाठी पडद्यामागून हालचाली सुरू असल्याचा आरोप विरोधकांकडून केला जात आहे. विजय यांच्या टीव्हीकेनं पहिल्याच निवडणुकीत प्रस्थापित पक्षांना मोठं आव्हान दिल्यानंतर भाजपची अस्वस्थता वाढल्याचं बोललं जात आहे. विशेषतः दक्षिणेत स्वतःचा प्रभाव वाढवण्याचा प्रयत्न करणाऱ्या भाजपला स्वतंत्र आणि आक्रमक प्रादेशिक नेतृत्व उभं राहणं धोक्याचं वाटत असल्याची चर्चा राजकीय वर्तुळात रंगली आहे.

याच पार्श्वभूमीवर राज्यपालांची भूमिका अधिकच संशयाच्या भोवऱ्यात अडकली आहे. सर्वात मोठा पक्ष असूनही टीव्हीकेला तातडीने निमंत्रण न देणं, बहुमतासाठी अतिरिक्त वेळ देणं आणि त्याचवेळी डीएमके-एआयडीएमकेच्या हालचालींना मोकळं मैदान मिळणं, हे सर्व पूर्वनियोजित राजकीय रणनीतीचा भाग असल्याचा आरोप केला जात आहे. “दिल्लीच्या इशाऱ्यावर तामिळनाडुत सत्ता समीकरणं बदलण्याचा प्रयत्न सुरू आहे,” असा दावा आता टीव्हीके समर्थक उघडपणे करू लागले आहेत.

टीव्हीकेच्या सर्व १०८ आमदारांनी राजीनामे दिल्यास तामिळनाडुत अभूतपूर्व घटनात्मक संकट निर्माण होऊ शकतं. तामिळनाडू विधानसभेची एकूण सदस्यसंख्या २३४ असून बहुमतासाठी ११८ आमदारांची आवश्यकता असते. मात्र मोठ्या प्रमाणावर राजीनामे स्वीकारले गेल्यास सभागृहाची प्रभावी सदस्यसंख्या कमी होऊ शकते आणि त्यानुसार बहुमताचा आकडाही बदलू शकतो. त्यामुळे सत्तेची संपूर्ण गणितंच उलटी होण्याची शक्यता आहे.