पत्रकारावर हल्ला; सहा वर्षांनंतर न्यायालयाचा धक्का — शेकाप सरचिटणीस जयंत पाटील दोषी ठरले!

रायगड : २०१९ च्या लोकसभा मतमोजणीदरम्यान लोकसत्ताचे पत्रकार हर्षद कशाळकर यांच्यावर हल्ला करणाऱ्या शेकाप सरचिटणीस आणि माजी आमदार जयंत पाटील यांना अखेर अलिबागच्या मुख्य न्यायदंडाधिकारी न्यायालयाने दोषी ठरवले आहे. सहा वर्ष चाललेल्या सुनावणीनंतर शुक्रवारी न्यायालयाने पाटील यांना भारतीय दंड विधान कलम ३२३ अंतर्गत दोषी ठरवत एक वर्ष चांगल्या वर्तणुकीचे हमीपत्र आणि पाच हजार रुपयांची नुकसानभरपाई देण्याचा आदेश दिला आहे.

घटनेनंतर तातडीने अलिबाग पोलीस ठाण्यात गुन्हा दाखल झाला. तपास अधिकारी पोलीस निरीक्षक के. डी. कोल्हे यांनी चौकशी पूर्ण करून न्यायालयात दोषारोपपत्र दाखल केले.

या प्रकरणाची सुनावणी मुख्य न्यायदंडाधिकारी श्रीमती एम. बी. अत्तार यांच्या न्यायालयात झाली. फिर्यादी, पंच, तपासिक अधिकारी आणि एकूण १३ साक्षीदारांची साक्ष नोंदवण्यात आली. सर्व साक्षी आणि पुराव्यांच्या आधारे न्यायालयाने पाटील यांना दोषी ठरवले

न्यायालयाने पाटील यांना तुरुंगात न पाठवता, अपराध प्रतिबंधक कायद्यानुसार एक वर्ष चांगल्या वर्तणुकीचे हमीपत्र सादर करण्याचे आणि पत्रकारास ५ हजार रुपये नुकसानभरपाई देण्याचे आदेश दिले.

गेली सहा वर्षे हे प्रकरण न्यायालयात प्रलंबित होते. सरकारी पक्षात प्रसाद सुदाम पाटील, कविता परिट आणि नईमा घट्टे यांनी न्यायालयीन लढाईत महत्त्वाची भूमिका बजावली. अखेर पत्रकारावर झालेल्या हल्ल्याला न्यायालयाने ‘हल्ला नव्हे, अपराध’ असा शिक्का मारत दोषी ठरवले.