हॉलिवूडनंतर आता क्रिकेटमध्येही ‘किंग’ची मोठी खेळी! लॉस एंजल्समध्ये शाहरुख खानच्या ‘नाईट रायडर्स’चे अत्याधुनिक क्रिकेट मैदान

बॉलिवूडचा ‘किंग खान’ म्हणून जगभर प्रसिद्ध असलेला शाहरुख खान आता अमेरिकेतील क्रिकेटच्या विस्तारातही महत्त्वाची भूमिका बजावत आहे. शाहरुख खान सह-मालक असलेल्या Knight Riders Group ने कॅलिफोर्नियातील लॉस एंजल्स परिसरातील पमोना (Pomona) येथे अत्याधुनिक Knight Riders Cricket Ground विकसित केले असून त्याचे नुकतेच अनावरण करण्यात आले आहे. हे मैदान Los Angeles Knight Riders या मेजर लीग क्रिकेट (MLC) संघाचे अधिकृत होम ग्राउंड असणार आहे.

सुमारे २१ दशलक्ष डॉलर (अंदाजे १८० कोटी) खर्चून उभारण्यात आलेल्या या मैदानात आठ दर्जेदार खेळपट्ट्या, आधुनिक सराव सुविधा आणि भविष्यात २० हजारांहून अधिक प्रेक्षकांची क्षमता विकसित करण्याची योजना आहे. अमेरिकेत क्रिकेटचा झपाट्याने वाढणारा प्रभाव आणि २०२८ च्या लॉस एंजल्स ऑलिम्पिकमध्ये क्रिकेटच्या पुनरागमनाच्या पार्श्वभूमीवर हा प्रकल्प अत्यंत महत्त्वाचा मानला जात आहे.

मैदानाच्या उद्घाटनावेळी शाहरुख खान यांनी हा क्षण “स्वप्न साकार झाल्यासारखा” असल्याचे सांगत, अमेरिकेत क्रिकेटची मजबूत पायाभरणी करण्यासाठी ही दीर्घकालीन गुंतवणूक असल्याचे नमूद केले. भविष्यात या ठिकाणी क्रिकेट अकादमी, युवा प्रशिक्षण आणि जागतिक दर्जाच्या सुविधा उभारण्याचाही समूहाचा मानस आहे.

कोलकाता नाईट रायडर्स, त्रिनबागो नाईट रायडर्स आणि अबूधाबी नाईट रायडर्सनंतर आता लॉस एंजल्स नाईट रायडर्सलाही स्वतःचे अत्याधुनिक मैदान मिळाल्याने Knight Riders Group ने जागतिक क्रिकेटमधील आपले स्थान आणखी मजबूत केले आहे. भारताबाहेर क्रिकेटचा प्रसार करण्याच्या दृष्टीने आणि अमेरिकेला उदयोन्मुख क्रिकेट बाजारपेठ म्हणून विकसित करण्याच्या प्रयत्नांमध्ये हा प्रकल्प महत्त्वाचा टप्पा मानला जात आहे.

…….