मातीपासून डॉलरपर्यंत: रायगडच्या महिलांनी गणरायाला दिली जागतिक भरारी

पेणच्या पारंपरिक गणेशमूर्ती उद्योगाला यंदा ग्रामीण महिलांच्या उद्योजकतेची नवी ओळख मिळाली आहे. रायगड जिल्हा परिषदेच्या जिल्हा ग्रामीण विकास यंत्रणेच्या पुढाकारातून राबविण्यात येणाऱ्या उमेद अभियानांतर्गत 247 महिला बचतगटांनी तब्बल 1 लाख 53 हजार 541 गणेशमूर्ती साकारल्या आहेत. विशेष म्हणजे यापैकी 2,250 गणेशमूर्ती थेट परदेशात पाठविण्यात येणार असून, मातीतून घडलेली ही कला आता जागतिक बाजारपेठेत झेपावणार आहे.

रायगड जिल्ह्यातील पेण तालुका गणेशमूर्तींचे माहेरघर म्हणून देशभर प्रसिद्ध आहे. पिढ्यान् पिढ्या जपलेल्या शिल्पकलेमुळे पेणच्या मूर्तींना भौगोलिक मानांकन (GI) प्राप्त झाले आहे. सुबक आखणी, रेखीव डोळे, आकर्षक रंगसंगती आणि पारंपरिक बैठक ही पेणच्या मूर्तींची वैशिष्ट्ये मानली जातात. या वारशात यंदा महिला बचतगटांनी मोठ्या प्रमाणावर सहभाग नोंदवत उद्योगाला नवे बळ दिले आहे.