गावाच्या विकासातून रायगडची राज्यात ‘एंट्री’; खालापूरच्या कामगिरीने जिल्हा परिषदेच्या ग्रामीण कारभारावर शिक्कामोर्तब

गावपातळीवरील विकासकामांना योग्य नियोजन, लोकसहभाग आणि प्रशासनाच्या समन्वयाची जोड मिळाली तर त्याचे परिणाम राज्याच्या व्यासपीठावरही उमटू शकतात, हे रायगडने दाखवून दिले आहे. मुख्यमंत्री समृद्ध पंचायतराज अभियान २०२५-२६ मध्ये खालापूर पंचायत समितीने राज्यात द्वितीय क्रमांक पटकावत रायगडच्या ग्रामीण विकासकामांची राज्यस्तरावर दखल मिळवून दिली आहे. त्यामुळे हा पुरस्कार केवळ खालापूर पंचायत समितीचा गौरव न राहता जिल्हा परिषद, पंचायत समिती आणि ग्रामपंचायत या तिन्ही स्तरांवरील समन्वयाच्या कामकाजावर मिळालेली पावती मानली जात आहे.

नाशिक येथे रविवारी झालेल्या राज्यस्तरीय पुरस्कार वितरण सोहळ्यात मुख्यमंत्री देवेंद्र फडणवीस यांच्या हस्ते खालापूर पंचायत समितीला द्वितीय क्रमांकाचा पुरस्कार प्रदान करण्यात आला. यावेळी ग्रामविकास मंत्री जयकुमार गोरे, नाशिकचे पालकमंत्री गिरीष महाजन, विधानपरिषद सभापती राम शिंदे, शिक्षणमंत्री दादा भुसे, अन्न व औषध प्रशासन मंत्री नरहरी झिरवाळ यांच्यासह वरिष्ठ अधिकारी आणि लोकप्रतिनिधी उपस्थित होते.

मुख्यमंत्री समृद्ध पंचायतराज अभियानात रायगड जिल्ह्यातील तब्बल १६३ ग्रामपंचायतींनी सहभाग नोंदविला होता. यामध्ये खालापूर तालुक्यातील नऊ ग्रामपंचायतींचा समावेश होता. अभियानातील विविध निकषांनुसार विकासकामांची अंमलबजावणी, लोकसहभाग, स्वच्छता, मूलभूत सुविधा आणि विविध उपक्रमांमध्ये सातत्य राखण्यावर भर देण्यात आला.

या कामगिरीमागे केवळ एखाद्या एका संस्थेचा प्रयत्न नसून जिल्हास्तरीय मार्गदर्शन, पंचायत समिती स्तरावरील नियोजन आणि ग्रामपंचायत स्तरावरील प्रत्यक्ष अंमलबजावणी यांचा समन्वय महत्त्वाचा ठरला. त्यामुळे गावातील विकासकामांची गुणवत्ता आणि त्याची अंमलबजावणी याकडे पाहण्याच्या पद्धतीला राज्यस्तरीय मान्यता मिळाली आहे.

हा पुरस्कार रायगड जिल्हा परिषदेच्या मुख्य कार्यकारी अधिकारी नेहा भोसले, कृषी व पशुसंवर्धन सभापती वैकुंठ पाटील, उपमुख्य कार्यकारी अधिकारी विशाल तनपुरे, गटविकास अधिकारी संदीप कराड तसेच चौक व वडवळ ग्रामपंचायतींचे सरपंच आणि ग्रामपंचायत अधिकारी यांनी स्वीकारला.

विशेष म्हणजे खालापूरसोबत तळा, श्रीवर्धन आणि अलिबाग पंचायत समित्यांनीही अभियानात उल्लेखनीय कामगिरी केली आहे. त्यामुळे रायगडच्या ग्रामीण भागात विविध स्तरांवर सुरू असलेल्या विकासकामांना राज्यस्तरीय स्पर्धेत चांगला प्रतिसाद मिळाल्याचे चित्र आहे.

दरम्यान, रायगड जिल्हा परिषदेचे अध्यक्ष मंगेश वाकडीकर यांनी या यशाबद्दल सर्व लोकप्रतिनिधी, अधिकारी, कर्मचारी, सरपंच आणि ग्रामपंचायत स्तरावरील घटकांचे अभिनंदन केले. मुख्यमंत्री समृद्ध पंचायतराज अभियान २.० मध्ये रायगडने यापेक्षाही सरस कामगिरी करावी, यासाठी सर्व ग्रामपंचायतींनी नव्या जोमाने सहभागी व्हावे, असे आवाहन त्यांनी केले.

ग्रामपातळीवरील संस्था सक्षमीकरण, लोकसहभाग, जलसंधारण आणि स्वच्छता यावर अभियान २.० मध्ये विशेष भर देण्याचे आवाहनही त्यांनी केले. प्रत्येक ग्रामपंचायतीने स्थानिक गरजा ओळखून विकासाचे नियोजन करावे आणि त्याची प्रभावी अंमलबजावणी करावी, अशी अपेक्षा त्यांनी व्यक्त केली.

खालापूरच्या राज्यस्तरीय यशामुळे रायगडच्या ग्रामीण विकासाला केवळ पुरस्काराची नव्हे, तर पुढील कामगिरीसाठी नवा मापदंड मिळाला आहे. आता अभियान २.० मध्ये या कामगिरीची पुनरावृत्ती नव्हे, तर त्यापेक्षा पुढची पायरी गाठण्याचे आव्हान रायगडसमोर आहे.

…..