३० वर्षे फाईलमागे उभा राहिलेला चेहरा; विनायक मोरे यांच्या सेवेला सलाम

नगर परिषदेच्या कार्यालयात रोज शेकडो फाईली एका टेबलवरून दुसऱ्या टेबलवर जातात. त्यावर अधिकाऱ्यांच्या सह्या होतात, पदाधिकाऱ्यांच्या निर्णयांचे शिक्के उमटतात आणि अखेर त्यातून शहरातील नागरिकांच्या आयुष्याशी संबंधित छोटे-मोठे निर्णय प्रत्यक्षात उतरतात. मात्र या प्रत्येक फाईलमागे वर्षानुवर्षे शांतपणे काम करणारे काही हात असतात. त्यांची नावे क्वचितच चर्चेत येतात. अलिबाग नगर परिषदेचे वरिष्ठ लिपिक विनायक यशवंत मोरे हे अशाच हातांपैकी एक. तब्बल ३० वर्षांची प्रदीर्घ सेवा पूर्ण करून निवृत्त होताना नगर परिषदेने त्यांच्या या सेवेला सन्मानाने सलाम केला.

नगर परिषदेच्या कार्यालयात रोज शेकडो फाईली एका टेबलवरून दुसऱ्या टेबलवर जातात. त्यावर अधिकाऱ्यांच्या सह्या होतात, पदाधिकाऱ्यांच्या निर्णयांचे शिक्के उमटतात आणि अखेर त्यातून शहरातील नागरिकांच्या आयुष्याशी संबंधित छोटे-मोठे निर्णय प्रत्यक्षात उतरतात. मात्र या प्रत्येक फाईलमागे वर्षानुवर्षे शांतपणे काम करणारे काही हात असतात. त्यांची नावे क्वचितच चर्चेत येतात. अलिबाग नगर परिषदेचे वरिष्ठ लिपिक विनायक यशवंत मोरे हे अशाच हातांपैकी एक. तब्बल ३० वर्षांची प्रदीर्घ सेवा पूर्ण करून निवृत्त होताना नगर परिषदेने त्यांच्या या सेवेला सन्मानाने सलाम केला.

विनायक मोरे यांच्या सेवापूर्तीनिमित्त आयोजित कार्यक्रमात नगर परिषदेच्या उपनगराध्यक्ष ॲड. मानसी म्हात्रे आणि सभापती प्रशांत नाईक यांनी त्यांचा शाल, श्रीफळ आणि पुष्पगुच्छ  देऊन सन्मान केला. पण हा सत्कार केवळ एका कर्मचाऱ्याच्या निवृत्तीचा औपचारिक कार्यक्रम नव्हता; तर तीन दशके नगर परिषदेच्या प्रशासकीय व्यवस्थेचा भाग बनून राहिलेल्या एका कर्मचाऱ्याच्या अनुभवाला दिलेली पोचपावती होती.

३० वर्षे हा काळ छोटा नाही. या तीन दशकांत शहर बदलले, प्रशासनाची कार्यपद्धती बदलली, कागदी फाईलींच्या जोडीला संगणक आले, तंत्रज्ञान आले, नियम आणि प्रक्रिया बदलल्या. नगर परिषदेतील पदाधिकारी बदलले, अधिकारी बदलले आणि सहकारीही बदलत गेले. या सगळ्या बदलांचे साक्षीदार होत विनायक मोरे यांनी मात्र आपली जबाबदारी सातत्याने पार पाडली.

नगर परिषदेसारख्या स्थानिक स्वराज्य संस्थेत वरिष्ठ लिपिकाचे काम केवळ कागदपत्रे किंवा फाईली हाताळण्यापुरते मर्यादित नसते. प्रशासनाच्या अनेक प्रक्रियांना जोडणारा तो एक महत्त्वाचा दुवा असतो. अनेक निर्णयांच्या प्रक्रियेत अशा कर्मचाऱ्यांचा वर्षानुवर्षांचा अनुभव उपयोगी पडत असतो. त्यामुळे मोरे यांच्या निवृत्तीच्या निमित्ताने “एखादा कर्मचारी निवृत्त झाल्यानंतर त्याच्याबरोबर त्याचा ३० वर्षांचा अनुभवही कार्यालयातून निवृत्त होतो का?” हा प्रश्नही स्वाभाविकपणे समोर येतो.

एखाद्या कर्मचाऱ्याच्या प्रदीर्घ सेवेचा गौरव शाल, श्रीफळ आणि टाळ्यांनी होतोच; परंतु त्या कर्मचाऱ्याने तीन दशकांत मिळवलेले प्रशासकीय ज्ञान, अनुभव आणि कार्यसंस्कृती पुढच्या पिढीतील कर्मचाऱ्यांपर्यंत पोहोचवणे हाच त्याच्या सेवेचा अधिक मोठा सन्मान ठरू शकतो. निवृत्त होणाऱ्या अनुभवी कर्मचाऱ्यांकडून नव्या कर्मचाऱ्यांना मिळणारे मार्गदर्शन हे कोणत्याही प्रशासकीय प्रशिक्षणापेक्षा कमी महत्त्वाचे नसते, असे मत सभापती प्रशांत नाईक यांनी व्यक्त करून विनायक मोरे यांना पुढील वाटचालीस शुभेच्छा दिल्या.

विनायक मोरे यांनी तीन दशकांच्या सेवेत प्रामाणिकपणा, शिस्त आणि कर्तव्यनिष्ठेचा आदर्श निर्माण केला आहे. नगर परिषदेच्या प्रशासकीय कामकाजात त्यांनी दिलेले योगदान मोलाचे असून, त्यांचा अनुभव आणि कार्यपद्धती भावी कर्मचाऱ्यांसाठी निश्चितच प्रेरणादायी ठरेल. त्यांच्या पुढील आयुष्यासाठी मनःपूर्वक शुभेच्छा देते, उपनगराध्यक्ष ॲड. मानसी म्हात्रे यांनी स्पष्ट केले

यावेळी उपस्थित मान्यवरांनी विनायक मोरे यांनी आपल्या सेवाकाळात बजावलेल्या कार्याचा गौरव करत त्यांच्या कर्तव्यनिष्ठेचे कौतुक केले आणि त्यांना पुढील आयुष्यासाठी शुभेच्छा दिल्या.

या कार्यक्रमाला मुख्याधिकारी सागर साळुंखे, नगरसेविका अश्विनी ठोसर, निवेदिता वाघमारे, साक्षी गौतम पाटील आणि संध्या पालवणकर, कर व प्रशासकीय अधिकारी श्रद्धा नवले व प्रियांका वाघ, आस्थापना विभागाचे प्रदीप धसाडे, अग्निशामक विभागाचे नामदेव जाधव, आरोग्य व पाणी पुरवठा विभागाच्या प्रियंका मोरे, NUML स्नेहा रणदिवे, शिक्षण विभागाचे राजेंद्र बोरे, बांधकाम विभागाचे संतोष मुंडे ऋतुजा फुटाणे, नगररचना विभागाचे सौरभ खरात, प्रशांत नांदगावकर यांच्यासह नगर परिषदेचे अधिकारी व कर्मचारी उपस्थित होते.

……