तरुण नेतृत्व, आधुनिक विचार आणि विकासाचा वेग; अलिबागमध्ये उभारत आहे नवे “मार्केट मॉडेल”

पर्यटन नगरी अलिबागचा चेहरा अधिक आधुनिक, सुबक आणि नागरिकाभिमुख करण्याच्या दिशेने नगराध्यक्षा अक्षया नाईक-उंडे यांनी विकासकामांना वेग दिला असून, पीएनपी नगर येथे उभारण्यात येणारे आधुनिक भाजी मार्केट हे त्या दृष्टीने महत्त्वाचे पाऊल मानले जात आहे. तरुण नेतृत्वाची ऊर्जा, माजी नगराध्यक्ष तथा बांधकाम सभापती प्रशांत नाईक यांची दूरदृष्टी आणि अलिबागला विकसित पर्यटन शहर म्हणून घडविण्याचा संकल्प यांची प्रभावी सांगड या प्रकल्पातून पाहायला मिळत आहे.

स्थानिक भाजी विक्रेत्यांना सन्मानाचे आणि सुरक्षित व्यासपीठ, नागरिकांना स्वच्छ व नियोजनबद्ध बाजारपेठ तसेच पर्यटकांना आधुनिक सुविधा उपलब्ध करून देणारा हा प्रकल्प अलिबागच्या बदलत्या विकासाचे प्रतीक ठरणार असल्याची भावना शहरवासीयांकडून व्यक्त होत आहे. या पार्श्वभूमीवर नगराध्यक्षा अक्षया नाईक-उंडे, बांधकाम सभापती प्रशांत नाईक, नगरसेवक समीर ठाकूर, अश्विनी ठोसर तसेच संबंधित अधिकारी यांनी पीएनपी नगर भाजी मार्केटच्या कामाची पाहणी करून प्रकल्पाच्या प्रगतीचा आढावा घेतला.

पाहणीदरम्यान नगराध्यक्षा अक्षया नाईक-उंडे यांनी सुरू असलेल्या कामांचा बारकाईने आढावा घेत दर्जा आणि वेळेचे नियोजन याबाबत संबंधित अधिकाऱ्यांना सूचना दिल्या. अलिबाग शहराचा झपाट्याने होत असलेला विस्तार, वाढती लोकसंख्या आणि पर्यटन क्षेत्रातील वाढ लक्षात घेता शहरात अधिक सक्षम आणि आधुनिक नागरी सुविधा निर्माण करण्याची गरज असल्याचे त्यांनी नमूद केले.

अलिबाग हे राज्यातील महत्त्वाचे पर्यटन केंद्र म्हणून ओळखले जाते. दरवर्षी हजारो पर्यटक शहराला भेट देतात. अशा परिस्थितीत शहरातील बाजारपेठा, वाहतूक व्यवस्था आणि नागरी सुविधा अधिक सुसज्ज करणे आवश्यक आहे. पीएनपी नगर भाजी मार्केट हा केवळ भाजी विक्रीचा प्रकल्प नसून शहराच्या नियोजनबद्ध विकासाचा भाग असल्याचे यावेळी स्पष्ट करण्यात आले. या प्रकल्पामुळे भाजी विक्रेत्यांना व्यवस्थित जागा उपलब्ध होणार असून नागरिकांनाही स्वच्छ, सुरक्षित आणि सुसंघटित वातावरणात खरेदी करता येणार आहे.

नगराध्यक्षा अक्षया नाईक-उंडे यांनी सांगितले की, “अलिबागकरांना उत्तम नागरी सुविधा उपलब्ध करून देणे हे आमचे कर्तव्य आहे. नागरिकांच्या दैनंदिन गरजांसोबतच शहराच्या भविष्यातील विकासाचाही विचार करून विविध प्रकल्प राबविले जात आहेत. अलिबागमध्ये येणाऱ्या पर्यटकांना आणि स्थानिक नागरिकांना दर्जेदार सुविधा मिळाव्यात यासाठी नगर परिषद सातत्याने प्रयत्नशील आहे.”

त्यांनी पुढे सांगितले की, अलिबागला पर्यटनाच्या नकाशावर अधिक प्रभावीपणे उभे करण्यासाठी मूलभूत सुविधांवर विशेष भर दिला जात आहे. स्वच्छता, सुशोभीकरण, बाजारपेठांचे आधुनिकीकरण आणि नागरिकांच्या सोयीसाठी आवश्यक पायाभूत सुविधा उभारणे याला प्राधान्य देण्यात येत आहे.

दरम्यान, या प्रकल्पामागे माजी नगराध्यक्ष तथा बांधकाम सभापती प्रशांत नाईक यांची दूरदृष्टी आणि नियोजन महत्त्वाचे ठरत आहे. शहराच्या वाढत्या गरजा ओळखून भविष्यातील आवश्यकता लक्षात घेऊन त्यांनी या प्रकल्पाची संकल्पना पुढे नेली. त्यांच्या मार्गदर्शनाखाली हा प्रकल्प वेगाने पूर्णत्वाकडे वाटचाल करत असून लवकरच नागरिकांच्या सेवेत दाखल होईल, असा विश्वास व्यक्त केला जात आहे.

अक्षया नाईक-उंडे यांच्या नेतृत्वाखाली अलिबाग नगर परिषद विकासाभिमुख कामांना प्राधान्य देत असल्याचे चित्र सध्या पाहायला मिळत आहे. निवडणुकीपूर्वी नागरिकांसमोर मांडलेल्या विकासाच्या संकल्पनांची आता प्रत्यक्ष अंमलबजावणी होत असल्याने नागरिकांमध्ये समाधान व्यक्त केले जात आहे. तरुण नेतृत्वाची कार्यक्षमता आणि अनुभवी नेतृत्वाचे मार्गदर्शन यांची सांगड घालत अलिबागला आधुनिक, सुबक आणि पर्यटनदृष्ट्या अधिक सक्षम शहर बनविण्याच्या दिशेने नगर परिषद वाटचाल करत असल्याचे या प्रकल्पातून अधोरेखित होत आहे.

पीएनपी नगर भाजी मार्केटचा प्रकल्प पूर्ण झाल्यानंतर तो केवळ बाजारपेठ राहणार नसून अलिबागच्या विकासाच्या नव्या पर्वाचे प्रतीक ठरेल, असा विश्वास नागरिकांकडून व्यक्त केला जात आहे.