“अमेरिकेचे दहशतवादविरोधी प्रमुख जो केंट यांनी पदाचा राजीनामा दिला”

अमेरिकेच्या राष्ट्रीय दहशतवाद विरोधी केंद्र (नॅशनल काउंटर-टेररिझम सेंटर-NCTC) चे संचालक जो केंट यांनी आपल्या पदाचा राजीनामा दिला आहे. इराणविरोधातील अमेरिकेच्या लष्करी भूमिकेचा निषेध करत त्यांनी हा निर्णय घेतल्याचे समोर आले आहे.

मिळालेल्या माहितीनुसार, केंट यांनी स्पष्टपणे नमूद केले की इराणकडून अमेरिकेला तातडीचा धोका नव्हता आणि अशा परिस्थितीत युद्धास समर्थन देणे योग्य नाही. त्यामुळे त्यांनी आपल्या पदावर राहणे शक्य नसल्याचे सांगत राजीनामा सादर केला.

दरम्यान, अमेरिकेचे राष्ट्राध्यक्ष डोनाल्ड ट्रम्प यांनी केंट यांच्या राजीनाम्यावर प्रतिक्रिया देताना त्यांच्यावर टीका केली. त्यांनी केंट यांना सुरक्षा विषयात कमकुवत असल्याचे म्हटले.

या राजीनाम्यामुळे अमेरिकन प्रशासनात अंतर्गत मतभेद असल्याचे स्पष्ट झाले असून, अमेरिका-इराण तणाव आणखी वाढण्याची शक्यता व्यक्त केली जात आहे.

जो  केंट हे अमेरिकेतील सुरक्षा व गुप्तचर क्षेत्रातील अनुभवी अधिकारी म्हणून ओळखले जातात. त्यांनी आपल्या कारकिर्दीत दहशतवादविरोधी कारवाया, राष्ट्रीय सुरक्षा धोरणे आणि गुप्तचर समन्वय यावर महत्त्वाची भूमिका बजावली. पुढे ते National Counterterrorism Center (NCTC) चे संचालक झाले, जिथे त्यांनी विविध अमेरिकी गुप्तचर संस्थांमधील माहितीची देवाणघेवाण आणि दहशतवादी धोक्यांचे विश्लेषण करण्याचे काम केले. कठोर आणि स्पष्टवक्ते अधिकारी म्हणून त्यांची ओळख असून, इराणविषयक धोरणांवर मतभेद झाल्यानंतर त्यांनी आपल्या पदाचा राजीनामा देत ठाम भूमिका घेतल्यामुळे ते पुन्हा चर्चेत आले.

दरम्यान,  जो केंट यांच्या राजीनाम्याने अमेरिकन सत्ताकेंद्राला जोरदार हादरा दिला असून, यामुळे प्रशासनातील दडपलेली नाराजी आता उघडपणे बाहेर येताना दिसत आहे. अनेक अधिकारी आणि नागरिक केंट  यांच्या भूमिकेला पाठिंबा देत असून, त्यांनी उघड केलेल्या मुद्द्यांमुळे डोनाल्ड ट्रम्प यांच्या धोरणांवर थेट सवाल उपस्थित झाले आहेत. ट्रम्प यांच्या निर्णयप्रक्रियेवर अविश्वास वाढत असून, त्यांच्या विरोधात आता उघड बंडाचे स्वर उमटू लागले आहेत. केंट यांचा राजीनामा हा केवळ एक प्रशासकीय बदल नसून, अमेरिकन सत्ताकारणातील वाढत्या अंतर्गत संघर्षाचा स्पष्ट इशारा मानला जात आहे.

…..