१२३ धावांचं आव्हान, पण जिद्दीचा डोंगर उंच! रायगडच्या मुलींचा सिंधुदुर्गवर थरारक विजय

रायगड : रायगडच्या मुलींनी पुन्हा एकदा आपली जिद्द, संयम आणि संघभावना दाखवत अटीतटीच्या सामन्यात विजय खेचून आणला. महाराष्ट्र क्रिकेट असोसिएशन यांच्यावतीने सुरू असलेल्या एकोणीस वर्षाखालील मुलींच्या एकदिवसीय ५० षटकांच्या निवड चाचणी स्पर्धेत रायगडच्या संघाने सलग दुसरा सामना जिंकत साखळी फेरीत आपली वाटचाल भक्कम केली आहे.

पेण येथील छत्रपती शिवाजी महाराज मैदानावर झालेल्या या सामन्यात रायगडचा सामना सिंधुदुर्ग जिल्ह्याच्या संघाशी झाला. धावसंख्या कमी असतानाही रायगडच्या मुलींनी हार न मानता प्रत्येक षटकात लढत दिली आणि सामना अखेरच्या क्षणापर्यंत रंगतदार ठेवला.

प्रथम फलंदाजी करत रायगडचा संघ अवघ्या २८.३ षटकांत १२३ धावांवर बाद झाला. धावफलक मर्यादित असला तरी सलामीवीर ब्रतती राय हिने खेळलेली तंत्रशुद्ध व आक्रमक ५३ धावांची खेळी संघासाठी संजीवनी ठरली. तिला काव्या धावडे हिने २५ धावांची मोलाची साथ दिली. सिंधुदुर्गकडून समृद्धी जोशीलकर (५ बळी) हिची गोलंदाजी प्रभावी ठरली.

१२४ धावांच्या आव्हानाचा पाठलाग करताना सिंधुदुर्गचा संघ दबावाखाली आला. रायगडच्या अचूक गोलंदाजी आणि चपळ क्षेत्ररक्षणामुळे त्यांचा डाव ११५ धावांत आटोपला. समृद्धी कांबळे हिने ४, तर समिधा तांडेल हिने २ बळी घेत सामन्याची दिशा बदलली. विशेष म्हणजे रायगडच्या मुलींनी तीन फलंदाज धावबाद करत क्षेत्ररक्षणातही आपली ताकद दाखवली.

अखेर ८ धावांनी मिळालेल्या या विजयामुळे रायगडच्या संघाचे मनोबल उंचावले आहे. रायगड जिल्हा क्रिकेट असोसिएशन चे अध्यक्ष अनिरुद्ध पाटील, सचिव प्रदीप नाईक तसेच सर्व पदाधिकारी व सदस्यांनी खेळाडू आणि प्रशिक्षकांचे अभिनंदन करत पुढील सामन्यांसाठी शुभेच्छा दिल्या आहेत.

हा विजय केवळ गुणतालिकेसाठी नाही, तर रायगडच्या मुलींच्या आत्मविश्वासाचा आणि लढाऊ वृत्तीचा ठोस पुरावा ठरला आहे.

….