रशिया टुडे भारतात; पत्रकारितेच्या क्षेत्रात मोठ्या बदलांची चाहूल : भारतीय पत्रकारितेला मिळणार आंतरराष्ट्रीय बूस्ट

सत्यमेव जयते न्यूज डॉट कॉम / डिजिटल डेस्क 

नवी दिल्ली : रशियाचे राष्ट्राध्यक्ष व्लादिमिर पुतिन यांच्या भारत दौऱ्यादरम्यान लाँच होणाऱ्या रशिया टुडे इंडिया – RT India मुळे भारतीय पत्रकारांसाठी नव्या संधींचे दार खुलणार आहे. रशियाच्या राज्यनियंत्रित ‘Russia Today’ नेटवर्कचा हा भारतातील पहिला पूर्ण बुरो असून, नोएडा फिल्म सिटीतील अत्याधुनिक स्टुडिओमधून चार इंग्रजी न्यूज बुलेटिन्स प्रसारित केले जाणार आहेत.

सुमारे 100 कर्मचाऱ्यांची मोठी टीम नियुक्त केली जात असल्यामुळे रिपोर्टर्स, प्रोडक्शन स्टाफ आणि तांत्रिक कर्मचाऱ्यांसाठी रोजगाराच्या संधी मोठ्या प्रमाणात वाढण्याची शक्यता आहे. आंतरराष्ट्रीय घडामोडी आणि भू-राजकीय विषयांवर भर देणाऱ्या RT India मुळे भारतीय पत्रकारांना जागतिक पातळीवरील रिपोर्टिंगचे व्यासपीठ मिळणार आहे.

पाश्चिमात्य माध्यमांच्या वर्चस्वाला पर्याय म्हणून “Not Anti-Western… Just Not Western” हा टॅगलाईन घेतलेले हे नेटवर्क मल्टी-पोलर दृष्टिकोनातून बातम्या मांडण्याचा प्रयत्न करणार आहे.

तथापि, RT हे रशियन सरकारच्या निधीवर चालणारे माध्यम असल्याने संपादकीय स्वातंत्र्याबाबत प्रश्नचिन्ह कायम राहते. याशिवाय पाश्चिमात्य देशांमध्ये RT ला ‘प्रचार माध्यम’ म्हणून ओळखले जात असल्यामुळे आंतरराष्ट्रीय स्तरावर काही मर्यादा जाणवू शकतात.

तरीदेखील, अत्याधुनिक उत्पादन सुविधा, जागतिक विषयांवर काम करण्याची संधी आणि पर्यायी पत्रकारितेचे व्यासपीठ या दृष्टीने RT India भारतीय पत्रकारांसाठी एक महत्त्वाची नवी दिशा ठरू शकते.