जनतेच्या सुविधेला प्राधान्य; प्रशांत नाईक यांच्या पुढाकाराने अलिबाग एसटी आगाराचा कायापालट, कर्मचाऱ्यांनी केले कौतुक

सत्यमेव जयते न्यूज डॉट कॉम 

अलिबाग | 

सार्वजनिक सुविधांची जबाबदारी केवळ प्रशासनाची नसून लोकप्रतिनिधींनीही समाजाप्रती उत्तरदायित्वाची जाणीव ठेवत गरज पडेल तेथे पुढाकार घ्यावा, याचे उदाहरण माजी नगराध्यक्ष तथा विद्यमान वीज व बांधकाम सभापती प्रशांत नाईक यांनी पुन्हा एकदा दाखवून दिले आहे.

अलिबाग एसटी आगार परिसरात अलीकडील मुसळधार पावसामुळे मोठ्या प्रमाणात चिखल, गाळ आणि कचरा साचला होता. त्यामुळे आगारात येणाऱ्या-जाणाऱ्या हजारो प्रवाशांना, महिला, ज्येष्ठ नागरिक तसेच शालेय व महाविद्यालयीन विद्यार्थ्यांना मोठ्या गैरसोयीचा सामना करावा लागत होता. आगारातील कर्मचारीही अस्वच्छ वातावरणात काम करण्यास भाग पडत असल्याने आरोग्याच्या दृष्टीने चिंताजनक परिस्थिती निर्माण झाली होती.

या समस्येची गंभीर दखल घेत अलिबाग एसटी आगाराचे वाहन निरीक्षक दिलीप पालवणकर आणि कर्मचाऱ्यांनी प्रशांत नाईक यांच्याशी संपर्क साधून परिस्थितीची माहिती दिली. माहिती मिळताच प्रशांत नाईक यांनी कोणताही विलंब न करता आगार परिसराची पाहणी केली. त्यानंतर स्वखर्चाने जेसीबी यंत्रणा उपलब्ध करून देत साचलेला चिखल, गाळ व माती हटविण्याचे काम तातडीने सुरू करण्यात आले. काही तासांतच आगार परिसर स्वच्छ करण्यात आल्याने प्रवासी आणि कर्मचाऱ्यांना मोठा दिलासा मिळाला.

अलिबाग एसटी आगार हे रायगड जिल्ह्यातील महत्त्वाचे वाहतूक केंद्र असून दररोज हजारो प्रवासी येथून प्रवास करतात. अशा ठिकाणी स्वच्छता, सुरक्षितता आणि मूलभूत सुविधा अबाधित राहणे अत्यंत आवश्यक आहे. ही सामाजिक जाणीव ठेवत प्रशांत नाईक यांनी कोणत्याही प्रसिद्धीची अपेक्षा न करता तत्परतेने मदतीचा हात पुढे केल्याची भावना अनेक प्रवाशांनी व्यक्त केली.

या कार्याबद्दल वाहन निरीक्षक दिलीप पालवणकर, अलिबाग एसटी आगार कर्मचाऱ्यांनी प्रशांत नाईक यांचे मनःपूर्वक आभार व्यक्त केले. “आणीबाणीच्या प्रसंगी दाखविलेली तत्परता आणि सार्वजनिक हितासाठी केलेले सहकार्य निश्चितच कौतुकास्पद आहे,” अशा शब्दांत कर्मचाऱ्यांनी त्यांच्या कार्याची प्रशंसा केली.

माजी नगराध्यक्ष म्हणून शहराच्या विकासासाठी अनेक उपक्रम राबविल्यानंतरही प्रशांत नाईक आज विद्यमान वीज व बांधकाम सभापती म्हणून नागरिकांच्या मूलभूत प्रश्नांबाबत तितक्याच संवेदनशीलतेने कार्यरत आहेत. शहरातील पायाभूत सुविधा, स्वच्छता, सार्वजनिक कामे आणि नागरिकांच्या दैनंदिन अडचणी सोडविण्यासाठी ते सातत्याने पुढाकार घेत असल्याचे या उपक्रमातून पुन्हा अधोरेखित झाले आहे.

स्वच्छता ही केवळ मोहीम नसून ती सार्वजनिक आरोग्याशी निगडित सामूहिक जबाबदारी आहे. लोकप्रतिनिधी, प्रशासन आणि नागरिक यांनी समन्वयाने काम केल्यास सार्वजनिक सुविधा अधिक सक्षम आणि नागरिकाभिमुख होऊ शकतात, असा सकारात्मक संदेश या उपक्रमातून देण्यात आला.

…….

“नागरिकांना दर्जेदार आणि सुरक्षित सुविधा उपलब्ध करून देणे हेच आमचे प्राधान्य आहे. सार्वजनिक ठिकाणी समस्या निर्माण झाल्यानंतर ती कोणाच्या अखत्यारित आहे, यावर चर्चा करण्यापेक्षा तातडीने उपाययोजना करणे अधिक महत्त्वाचे आहे. अलिबाग शहराच्या विकासासाठी आणि नागरिकांच्या हितासाठी भविष्यातही अशाच प्रकारे सहकार्य करत राहू.” — प्रशांत नाईक, माजी नगराध्यक्ष तथा विद्यमान वीज व बांधकाम सभापती, अलिबाग नगर परिषद