कोकणातील कर्मचारी संघटनेला नवे नेतृत्व! कास्ट्राईबच्या कोकण विभागाची धुरा संजीव मोरेंकडे; रायगड जिल्हाध्यक्षपदाचीही दुहेरी जबाबदारी
सत्यमेव जयते न्यूज डॉट कॉम
अलिबाग |
कास्ट्राईब कर्मचारी महासंघाच्या कोकण विभागात संघटनात्मक नेतृत्वाची नवी जबाबदारी संजीव मोरे यांच्या खांद्यावर सोपविण्यात आली आहे. महाराष्ट्र राज्य कास्ट्राईब कर्मचारी महासंघाचे अध्यक्ष कृष्णा इंगळे यांनी विश्वास व्यक्त करत संजीव मोरे यांची कोकण विभागीय अध्यक्ष तसेच रायगड जिल्हा अध्यक्ष म्हणून निवड केली आहे.
कर्मचाऱ्यांच्या विविध प्रश्नांसाठी सातत्याने आवाज उठविणे, सामाजिक कार्यात सक्रिय सहभाग आणि विविध सामाजिक उपक्रमांमध्ये उल्लेखनीय योगदान या कार्याची दखल घेत मोरे यांच्यावर ही महत्त्वाची जबाबदारी सोपविण्यात आली आहे. त्यांच्या निवडीमुळे कोकण विभागातील कर्मचारी वर्गात उत्साहाचे वातावरण निर्माण झाले आहे.
कर्मचारी प्रश्नांपासून संघटन बळकटीपर्यंत मोठी जबाबदारी
कोकण विभागातील कर्मचाऱ्यांच्या समस्या शासन आणि प्रशासनाच्या पातळीवर प्रभावीपणे मांडणे, कर्मचाऱ्यांना न्याय मिळवून देण्यासाठी संघटित ताकद उभी करणे आणि महासंघाची संघटनात्मक बांधणी अधिक मजबूत करणे, अशी आव्हाने आता संजीव मोरे यांच्यासमोर असणार आहेत.
दरम्यान, त्यांच्या निवडीबद्दल सचिन ओव्हाळ, संतोष साळावकर, विकास बडे, अंजली वर्तक, अभिजीत पालवे, खंडू बागूल, राजेंद्र गायकवाड, अनंत बनसोडे, अशोक कुकलारे, संतोष बनसोडे, संजीव चोपडे यांच्यासह विविध मान्यवरांनी अभिनंदन केले.
“मोरे यांच्या नेतृत्वाचा संघटनेला निश्चितच फायदा होईल,” असा विश्वास व्यक्त करत त्यांच्या पुढील वाटचालीसाठी शुभेच्छांचा वर्षाव करण्यात आला आहे. नव्या जबाबदारीनंतर संजीव मोरे कोकणातील कर्मचारी प्रश्नांना किती प्रभावीपणे दिशा देतात, याकडे आता कर्मचारी वर्गाचे लक्ष लागले आहे.
