दिलीप भोईर यांच्यासह 21 जणांना सात वर्षांची शिक्षा; 12 वर्षांपूर्वीच्या चोंढी मारहाण प्रकरणी जिल्हा न्यायालयाचा निर्णय

रायगड : काही महिन्यांपूर्वी भाजपमधून शिंदे गटात प्रवेश केलेले दिलीप भोईर उर्फ छोटम शेठ यांच्यासह 21 आरोपींना 12 वर्षांपूर्वी चोंढी येथे झालेल्या मारहाणीप्रकरणी जिल्हा न्यायालयाने दोषी ठरवले आहे.

 जिल्हा व सत्र न्यायालयाचे प्रमुख न्यायाधीश राजेंद्र सावंत यांनी आरोपींना  सात वर्षांची सक्तमजुरी आणि प्रत्येकी तीन हजार रुपयांचा दंड अशी शिक्षा सुनावत गुरुवारी दोषी ठरवले.

या प्रकरणात हाफ मर्डर आणि मारामारीचे गुन्हे दाखल होते. 25 आरोपींपैकी चार जणांची निर्दोष मुक्तता करण्यात आली आहे.

नोव्हेंबर 2012 मध्ये काँग्रेस कार्यकर्त्यांवर हल्ल्याप्रकरणी तत्कालीन रायगड जिल्हा परिषदेचे समाजकल्याण सभापती दिलीप भोईर आणि त्यांच्या साथीदारांना अटक करण्यात आली होती. सभापतीपदावर असताना पोलीस कोठडीत जाणारे भोईर हे रायगड जिल्हा परिषदेचे पहिले सभापती ठरले होते.

11 सप्टेंबर 2012 रोजी चोंढी येथे किरकोळ वादातून काँग्रेसचे विजय थळे, त्यांची पत्नी रूपाली थळे आणि इतर कार्यकर्त्यांवर शेकापचे दिलीप भोईर आणि समर्थकांनी हल्ला केला होता. याप्रकरणी मांडवा सागरी पोलीस ठाण्यात गुन्हा नोंद झाला. त्यानंतर तब्बल पावणेदोन महिने छोटम पोलिसांना चकवा देत फरार होते. उच्च न्यायालयाने त्यांचा अटकपूर्व जामीन अर्ज फेटाळल्यानंतर न्यायालयाच्या आदेशानुसार त्यांनी अखेर शरणागती पत्करली.

दरम्यान सरकार पक्षातर्फे ज्येष्ठविधीज्ञ एडवोकेट प्रसाद पाटील यांनी काम पाहिले. काहीच महिन्यांमध्ये स्वराज्य संस्थांच्या निवडणुका होऊ घातल्या आहेत. दिलीप भोईर हे जिल्हा परिषदेचे निवडणूक लढवण्यास इच्छुक आहेत. मात्र न्यायालयाच्या या निकालामुळे त्यांना निवडणूक लढवता येणार नाही.

….

या निर्णयानंतर छोटम भोईर आगामी स्वराज्य संस्थांच्या निवडणुका लढवू शकतील का, याबाबत चर्चेला उधाण आले आहे. तीन वर्षापेक्षा अधिक  शिक्षा सुनावण्यात आल्याने आरोपींना तात्काळ अटक करण्यात येते अशी माहिती  सरकारी वकील एडवोकेट प्रसाद पाटील यांनी दिली.