🇮🇳 ‘हर घर तिरंगा’ला यंदा नवा उत्साह – प्रशासन सज्ज, नागरिकांना खुले आमंत्रण!

रायगड : ‘हर घर तिरंगा’ मोहीम आता लोकचळवळीत रूपांतरित झाली असून, यंदाही ती अधिक प्रभावीपणे राबवावी, असे स्पष्ट निर्देश रायगडचे जिल्हाधिकारी किशन जावळे यांनी दिले आहेत. नागरिकांचा उत्स्फूर्त सहभाग हे या उपक्रमाचे खरे बलस्थान असल्याचेही ते म्हणाले.

या अभियानाच्या अंमलबजावणीसाठी शासनाने तीन टप्प्यांत कार्यवाही करण्याचे निर्देश दिले आहेत:

पहिला टप्पा: 8 ऑगस्टपर्यंत

दुसरा टप्पा: 9 ते 12 ऑगस्ट

तिसरा टप्पा: 13 ते 15 ऑगस्ट

या काळात शहरी व ग्रामीण भागांतील प्रत्येक घरावर तसेच शासकीय, निमशासकीय, सहकारी आणि खासगी आस्थापनांवर तिरंगा फडकवण्यात येणार आहे. अमृत सरोवर, वारसा स्थळे, तसेच प्रशासकीय इमारतींवर देखील तिरंगा फडकवून देशभक्तीचा जागर केला जाणार आहे.

प्रत्येक ग्रामपंचायत, नगरपरिषद आणि जिल्हास्तरावर विशेष उपक्रमांचे आयोजन करण्यात येणार असून, शाळा-महाविद्यालयांमध्ये स्पर्धा, रॅली, प्रदर्शने आणि सांस्कृतिक कार्यक्रम आयोजित केले जाणार आहेत. वारसा स्थळांवर आकर्षक रोषणाई केली जाणार आहे.

यंदा काही नाविन्यपूर्ण उपक्रमांचीही आखणी करण्यात आली असून, नागरिकांनी या अभियानात सक्रिय सहभाग नोंदवावा, असे आवाहन जिल्हा प्रशासनाने केले आहे.

—