Gen-Zच्या आवाजापासून ठाकरे बंधूंच्या आंदोलनाला; शेकापच्या धगधगत्या लाल वज्रमुठीची साथ! ‘मतदार कोण ठरवणार?’ SIRवर जयंत पाटलांचा थेट सवाल

मतदार यादीतील नाव हा केवळ कागदावरील एक तपशील नाही; ते नागरिकाच्या लोकशाही अधिकाराचे प्रवेशद्वार आहे. त्यामुळे SIRच्या प्रक्रियेवर शेतकरी कामगार पक्षाने केवळ निवडणूक आयोगाच्या कार्यपद्धतीवर आक्षेप नोंदवला नसून, ‘मतदार कोण ठरवणार?’ हा थेट आणि मूलभूत सवाल शेकापचे सरचिटणीस माजी आमदार जयंत पाटील यांनी उपस्थित केला. अलिबाग शेतकरी भवनमध्ये पत्रकार परिषदेत ते बोलत होते.

तरुणांच्या आंदोलनापासून ठाकरे बंधूंच्या संयुक्त मोर्चापर्यंत SIRविरोधातील आवाजाला साथ देताना माजी आमदार जयंत पाटील यांनी राज्यभरातील पक्ष संघटनेला मैदानात उतरण्याचे आवाहन केले असून, ४ ऑक्टोबरच्या मुंबईतील आंदोलनाला शेकापच्या लाल वज्रमुठीची ताकद मिळणार आहे.

Gen-Zच्या अस्वस्थतेतून उठलेला आवाज आता राजकीय रस्त्यावर उतरला आहे. ठाकरे बंधूंच्या संयुक्त मोर्चाने त्या आवाजाला व्यासपीठ दिले असताना, शेतकरी कामगार पक्षाने त्याला आपल्या लाल वज्रमुठीची संघटनात्मक साथ देण्याची भूमिका घेतली आहे. मात्र या साऱ्या आंदोलनाच्या केंद्रस्थानी शेकापने एक मूलभूत प्रश्न आणला आहे ‘मतदार कोण ठरवणार?’

अभिजीत दीपके यांच्या नेतृत्वाखाली सुरू असलेल्या आंदोलनाला शेकापने पाठिंबा दिला आहे. त्याचबरोबर राज ठाकरे आणि उद्धव ठाकरे यांच्या नेतृत्वाखाली ४ ऑक्टोबरला होणाऱ्या संयुक्त मोर्चालाही पक्षाने समर्थन दिले आहे. त्यामुळे Gen-Zच्या आंदोलनातून पुढे आलेला SIRचा प्रश्न आता विविध राजकीय प्रवाहांना एका समान मुद्द्यावर आणताना दिसत आहे.

जयंत पाटील यांनी भारतीय निवडणूक आयोगावर गंभीर आरोप करत आयोग कायदे धाब्यावर बसवून काम करत असल्याचे म्हटले. देशातील तरुण वर्गातून या भूमिकेविरोधात आवाज उठत असून, अभिजीत दीपके यांच्या आंदोलनालाही शेकापचा पाठिंबा असल्याचे त्यांनी स्पष्ट केले.

SIRविरोधातील ही भूमिका केवळ एखाद्या पक्षाच्या राजकीय कार्यक्रमापुरती मर्यादित नसून, मतदाराच्या अधिकाराशी संबंधित असल्याचे पाटील यांनी अधोरेखित केले.

दरम्यान, शेकापच्या राज्य प्रवक्त्या चित्रलेखा पाटील यांनीही SIRच्या विरोधात शिवसेना ठाकरे गटाने घेतलेली भूमिका योग्य असल्याचे सांगत त्याला पक्षाचा पाठिंबा असल्याचे स्पष्ट केले. अभिजीत दीपके आणि ठाकरे बंधूंनी घेतलेल्या भूमिकेलाही शेकापचा पाठिंबा असल्याचे त्यांनी सांगितले.

“ज्ञानेश कुमार यांनी राजीनामा दिलाच पाहिजे आणि त्यांना अटक झाली पाहिजे,” अशी मागणी चित्रलेखा पाटील यांनी केली. निवडणूक प्रक्रियेबाबत निर्माण झालेल्या प्रश्नांवर सरकार आणि निवडणूक आयोगाने स्पष्ट भूमिका मांडण्याची गरज असल्याचेही त्यांनी म्हटले.

SIR आणि निवडणूक आयोगाच्या कार्यपद्धतीविरोधात ४ ऑक्टोबर रोजी मुंबईत राज ठाकरे आणि उद्धव ठाकरे यांच्या नेतृत्वाखाली संयुक्त मोर्चा काढण्यात येणार आहे. सकाळी १० वाजता मेट्रो सिनेमाजवळ कार्यकर्ते आणि नागरिक जमणार असून, त्यानंतर मोर्चाला सुरुवात होईल. मेट्रो सिनेमापासून निघणारा मोर्चा मुंबई महानगरपालिका मुख्यालयापर्यंत जाणार आहे. तेथे मोर्चाचे सभेत रूपांतर होणार असून प्रमुख नेते आपली भूमिका मांडणार आहेत.

यापूर्वी भायखळा येथील रिचर्डसन अँड क्रुडास कंपनीपासून मुंबई महानगरपालिका मुख्यालयापर्यंत मोर्चा काढण्याचे नियोजन करण्यात आले होते. मात्र, मुंबई पोलिसांच्या सूचनेनंतर मोर्चाच्या मार्गात बदल करण्यात आला. आता मेट्रो सिनेमापासून मोर्चा काढण्यात येणार आहे.

मोर्चाचे आणखी एक वैशिष्ट्य म्हणजे सहभागी होणाऱ्यांनी पक्षांचे झेंडे न वापरता केवळ तिरंगा घेऊन सहभागी व्हावे, असे आवाहन करण्यात आले आहे. त्यामुळे SIRच्या मुद्द्यावर पक्षीय सीमांपलीकडे व्यापक सहभाग उभा करण्याचा प्रयत्न होत आहे.

या पार्श्वभूमीवर जयंत पाटील यांनी राज्यातील शेकापच्या सर्व जिल्ह्यांतील कार्यकर्त्यांनी मोठ्या संख्येने मुंबईतील मोर्चात सहभागी व्हावे, असे आवाहन केले आहे. त्यामुळे ४ ऑक्टोबरच्या आंदोलनात तरुणांचा आवाज, ठाकरे बंधूंचे संयुक्त नेतृत्व आणि शेकापची संघटनात्मक ताकद एकाच मुद्द्यावर एकत्र येणार आहे.

SIRच्या निमित्ताने शेकापने उपस्थित केलेला प्रश्न त्यामुळे केवळ निवडणूक आयोगाच्या कार्यपद्धतीपुरता मर्यादित राहत नाही. मतदाराचा अधिकार कोणत्या निकषांवर ठरवला जाणार, या मूलभूत प्रश्नाला राजकीय चर्चेच्या केंद्रस्थानी आणण्याचा प्रयत्न शेकापने केला आहे. त्यामुळे ४ ऑक्टोबरचा मोर्चा हा केवळ राजकीय शक्तिप्रदर्शन न राहता, मतदाराच्या अधिकाराच्या प्रश्नावर विविध प्रवाह एकत्र येतात का, याचीही कसोटी ठरणार आहे.

या प्रसंगी महिला आघाडी प्रमुख ॲड. मानसी म्हात्रे, कामगार आघाडी प्रमुख प्रदिप नाईक, तालुका चिटणीस सुरेश घरत, शेकाप जिल्हा चिटणीस मंडळाचे सदस्य अनिल पाटील, माजी तालुका चिटणीस अनिल पाटील, शेतकरी संघटनेचे अनिल गोमा पाटील, निलेश खोत, सुरेश पाटील, तालुका सहचिटणीस नरेश म्हात्रे, रायगड बाजारचे उपाध्यक्ष प्रमोद घासे तसेच विविध आघाडीचे पदाधिकारी उपस्थित होते.

……