अजित पवारांच्या विमान अपघातावेळी वैमानिकाने ‘मेडे, मेडे’ संदेश पाठवल्याची माहिती

महाराष्ट्राचे उपमुख्यमंत्री अजित पवार यांच्या प्रवासादरम्यान झालेल्या विमान अपघातावेळी वैमानिकाने एअर ट्रॅफिक कंट्रोल (ATC) ला “मेडे, मेडे” असा आपत्कालीन संदेश पाठवल्याची माहिती समोर आली आहे. हा संदेश विमानाला गंभीर तांत्रिक अडचण किंवा जीविताला धोका निर्माण झाल्याच्या स्थितीत दिला जातो.

सूत्रांनी दिलेल्या माहितीनुसार, अपघात होण्याच्या काही क्षण आधी वैमानिकाने ATC शी संपर्क साधत विमानातील तांत्रिक बिघाडाची माहिती दिली होती. त्यानंतर “Mayday, Mayday” असा संदेश प्रसारित करण्यात आला, जो आंतरराष्ट्रीय स्तरावर आपत्कालीन संकटाचा इशारा मानला जातो.

वैमानिक विमानावर नियंत्रण सुटणे, इंजिन फेल होणे, आग लागणे किंवा अन्य गंभीर तांत्रिक बिघाड झाल्यास हा संदेश पाठवतो. यामध्ये विमानाची ओळख, सध्याचे स्थान, उंची, समस्या आणि विमानात असलेल्या प्रवाशांची संख्या याची माहिती दिली जाते, जेणेकरून बचाव यंत्रणा तात्काळ सक्रिय होऊ शकतात.

हे विमान Bombardier Learjet 45XR (नोंदणी: VT-SSK) असून ते VSR Ventures Pvt. Ltd. या चार्टर कंपनीकडून ऑपरेट करण्यात येत होते. हे एक 9-सीटर प्रायव्हेट बिझनेस जेट आहे. अजित पवार आणि अन्य प्रवासी या विमानातून प्रवास करत असताना बारामती परिसरात हा अपघात झाला.

या घटनेची नागरी विमान वाहतूक महासंचालनालय (DGCA) आणि एअरक्राफ्ट अ‍ॅक्सिडेंट इन्व्हेस्टिगेशन ब्युरो (AAIB) कडून चौकशी सुरू करण्यात आली आहे. वैमानिकाने पाठवलेल्या मेडे कॉलची रेडिओ रेकॉर्डिंग, फ्लाइट डेटा आणि ब्लॅक बॉक्सच्या आधारे तांत्रिक कारणांचा शोध घेतला जात आहे.

दरम्यान, या घटनेनंतर विमान सुरक्षेचा मुद्दा पुन्हा एकदा ऐरणीवर आला असून, चार्टर फ्लाइट्सच्या देखभाल आणि तपासणी प्रक्रियेवर अधिक कडक लक्ष देण्याची मागणी होत आहे.