महाराष्ट्राच्या काळजाला तडा : अजित पवार यांच्या अपघाती जाण्याने राज्य शोकसागरात बुडाले

आजचा दिवस महाराष्ट्रासाठी काळ्या अक्षरांनी लिहिला जाणारा ठरला आहे. राजकारणाच्या रणांगणात ठामपणे उभा राहणारा, निर्णयांमध्ये कठोर पण जनतेच्या प्रश्नांसाठी संवेदनशील असलेला एक अनुभवी नेता आज अचानक शांत झाला आहे. राज्याचे उपमुख्यमंत्री आणि राष्ट्रवादी काँग्रेसचे ज्येष्ठ नेते अजित पवार यांच्या विमानाचा बारामती येथे लँडिंगदरम्यान झालेला भीषण अपघात ही केवळ एक दुर्घटना नसून, संपूर्ण महाराष्ट्राच्या मनावर उमटलेली खोल जखम ठरली आहे.

मुंबईहून बारामतीकडे निघालेले चार्टर्ड विमान धावपट्टीवर उतरतानाच काही क्षणांत अनर्थ घडला. प्रत्यक्षदर्शींनी सांगितले की, विमानाने जमिनीला स्पर्श करताच मोठा आवाज झाला, आणि क्षणार्धात आगीचे लोळ उठले. आकाशात काळा धूर पसरला आणि परिसरात एक भयावह शांतता दाटून आली. मदतकार्य तातडीने सुरू झाले, अग्निशमन दल आणि प्रशासन घटनास्थळी धावून आले, मात्र वेळेने सर्व काही हिरावून नेले होते.

प्राथमिक माहितीनुसार अपघातग्रस्त विमान हे Bombardier Learjet 45XR (VT-SSK) होते, जे VSR Ventures Pvt. Ltd. या चार्टर कंपनीकडून ऑपरेट केले जात होते, ची माहिती समोर आली आहे. हे एक प्रायव्हेट बिझनेस जेट असून, या प्रवासात त्यामध्ये अजित पवार यांच्यासह काही सहप्रवासी आणि दोन क्रू सदस्य उपस्थित होते. अपघात इतका भीषण होता की, कोणालाही वाचवता येऊ शकले नाही, अशी वेदनादायक माहिती समोर आली आहे.

अजित पवार हे केवळ एक राजकीय व्यक्ती नव्हते, तर अनेकांसाठी एक आधार, एक आवाज आणि एक ठाम नेतृत्व होते. शेतकऱ्यांचे प्रश्न असोत, पाण्याचा तुटवडा असो, अर्थसंकल्पाची मांडणी असो किंवा प्रशासनातील निर्णय त्यांच्या व्यक्तिमत्त्वात कठोरता आणि जबाबदारीचा संगम होता. आज त्यांच्या जाण्याने राज्याने केवळ एक उपमुख्यमंत्री नाही, तर एक अनुभवी मार्गदर्शक गमावला आहे, अशी भावना सर्वत्र व्यक्त होत आहे.

या दुःखद घटनेनंतर संपूर्ण राज्यात आणि देशभरात शोककळा पसरली आहे. राजकीय नेते, सामाजिक कार्यकर्ते, सामान्य नागरिक सर्वजण हळहळ व्यक्त करत आहेत. सोशल मीडियावरून श्रद्धांजलीचे संदेश, आठवणींचे शब्द आणि डोळ्यांत पाणी आणणाऱ्या प्रतिक्रिया येत आहेत. मंत्रालयाच्या दालनांपासून ते गावाच्या चौकापर्यंत आज एकच विषय आहे. “हे असं अचानक कसं घडलं?”

दरम्यान, या दुर्घटनेची DGCA आणि AAIB कडून सखोल चौकशी सुरू आहे. तांत्रिक बिघाड, हवामानाची स्थिती किंवा इतर कोणते कारण या अनर्थामागे होते, याचा शोध घेतला जात आहे. पण कारण काहीही असो, या अपघाताने महाराष्ट्राच्या मनावर उमटलेली जखम न भरणारी आहे.

आज बारामतीपासून मुंबईपर्यंत, ग्रामीण भागापासून राजधानीपर्यंत एकच शांतता पसरली आहे. शब्द अपुरे पडत आहेत, भावना व्यक्त करताना डोळे भरून येत आहेत.

एक नेता गेला आहे, पण त्याच्या निर्णयांची, वादांची, संघर्षांची आणि आठवणींची छाया महाराष्ट्राच्या राजकारणावर कायम राहणार आहे.

……

अजित पवार यांच्या निधनानंतर बोलताना देवेंद्र फडणवीस यांनी म्हटले की, महाराष्ट्राकरिता आजचा दिवस अतिशय कठीण असा दिवस आहे. महाराष्ट्राच्या विकासासाठी ते अत्यंत महत्वपूर्ण योगदान देत होते.

…….

“आज माझा मोठा भाऊ हरपल्यासारखी भावना आहे. अजित पवार हे केवळ नेते नव्हते, तर ते एक अभ्यासू, वेळेचं भान ठेवणारे आणि प्रशासनावर मजबूत पकड असलेले व्यक्तिमत्त्व होते,” अशा शब्दांत उपमुख्यमंत्री एकनाथ शिंदे यांनी अजित पवार यांच्या निधनावर तीव्र शोकभावना व्यक्त केली.