ध्वनीप्रदूषणावर ‘नो टॉलरन्स’!

पोलिस विभागाने जिल्ह्यातील संवेदनशील आणि अतिसंवेदनशील ठिकाणांची यादी सादर केली. गणेशोत्सवाच्या दरम्यान २७ ऑगस्टपासून ६ सप्टेंबरपर्यंत वाढीव पोलिस बंदोबस्त ठेवण्यात येणार असून, ईदच्या मिरवणुकांसाठी स्वतंत्र सुरक्षा आराखडा आखण्यात आला आहे. गर्दी नियंत्रण, वाहतूक व्यवस्थापन, सीसीटीव्ही कॅमेरे तपासणी, तसेच पोलीस पथके तैनात करण्याचा निर्णय घेण्यात आला.

जिल्हाधिकारी यांनी सर्व गणेश मंडळांना ध्वनीप्रदूषण नियंत्रण नियमांचे काटेकोर पालन करण्याचे निर्देश दिले. रात्री ठराविक वेळेनंतर लाउडस्पीकर आणि वाद्यवृंद बंद ठेवणे बंधनकारक राहील. मंडप उभारणीसाठी आवश्यक परवानगी घेणे, विद्युत जोडणी सुरक्षित ठेवणे, अग्निशमन सुविधा उपलब्ध करणे यावर भर देण्यात आला.

आरोग्य विभागाने आपत्कालीन वैद्यकीय सुविधा, रुग्णवाहिका उपलब्धतेची माहिती दिली. विद्युत विभागाने खंडित वीजपुरवठा टाळण्यासाठी विशेष पथके तयार ठेवण्याचे सांगितले. अग्निशमन दल, नगरपरिषद, ग्रामपंचायतींनीही स्वच्छता, पाणीपुरवठा, रस्ते दिवे, कचरा व्यवस्थापन आदी बाबतीत तयारी असल्याचे स्पष्ट केले.

अनंत चतुर्दशी विसर्जन मिरवणुका तसेच ईदच्या मिरवणुकीसाठी वेळापत्रक निश्चित करण्यात आले. ठरलेल्या वेळेच्या आत मिरवणुका पूर्ण करण्याची सक्ती राहील. मार्गक्रमणादरम्यान कायदा-सुव्यवस्था बिघडविणाऱ्या कोणत्याही घटकांवर तात्काळ कारवाई करण्याचा इशारा पोलिसांनी दिला.

बैठकीत विविध संघटनांनीही प्रशासनाला सहकार्य करण्याची ग्वाही दिली. “सण आनंदात आणि सुरक्षिततेत साजरे व्हावेत, ही सर्वांची सामूहिक जबाबदारी आहे,” असे जिल्हाधिकाऱ्यांनी सांगितले.

बैठकीस पोलिस अधीक्षक, अतिरिक्त जिल्हाधिकारी, उपविभागीय अधिकारी, पोलिस उपअधीक्षक, तहसीलदार, नगरपरिषद, ग्रामपंचायत प्रतिनिधी, विविध विभागांचे प्रमुख तसेच जिल्ह्यातील प्रमुख गणेश मंडळे, मुस्लिम समाज व सामाजिक संस्थांचे पदाधिकारी मोठ्या संख्येने उपस्थित होते.