“जिल्हा आरोग्य अधिकारी कोण? – ‘पब्लिक’ला गेसिंग गेम खेळायला लावणारा कारभार!”

रायगड : जिल्ह्याच्या आरोग्य विभागात सध्या ‘संगीत खुर्ची’चा खेळ रंगात आला आहे — आणि विशेष म्हणजे, वाद्यं वाजवण्याचं काम स्वतः जिल्हा प्रशासन करत आहे! जिल्हा आरोग्य अधिकारी कोण? निर्णय कुणाचा? आदेश कुणाचे? — या प्रश्नांची उत्तरं रोज बदलतात, अगदी हवामान अंदाजासारखी! डॉ. दयानंद सूर्यवंशी अधिकृत अधिकारी, पण प्रत्यक्षात कामं करतात डॉ. मनिषा विखे. कर्मचाऱ्यांचे आदेश वेगवेगळ्या दिशांनी येतात, आणि त्यांना कळत नाही की फाईल कुणाच्या सह्याने पुढे सरकवायची.

प्रशासन मात्र या गोंधळाकडे ‘हसत खेळत’ पाहतंय — जणू काही आरोग्य खातं नाही, तर एखादा टी.व्ही. सिरीयलचा सेट आहे! जिथं दर दिवशी नवीन ट्विस्ट, नवीन पात्र, आणि खुर्चीवर नवा कलाकार. फक्त फरक इतकाच की, या खेळात लोकांचं आरोग्य धोक्यात येतंय.

शासनाने नियुक्ती केली, अधिकार काढून घेतले, मॅटमध्ये सुनावणी सुरू आहे, आणि या सगळ्या गोंधळात ‘जनता’ आणि ‘सेवा’ कुठे हरवली याचं कोणालाच भान राहिलेलं नाही. एवढ्या महत्त्वाच्या पदावर असा खुला गोंधळ सुरू असताना, जिल्हा परिषदेला अजूनही ठोस निर्णय घ्यावा वाटत नाही, हेच सांगतं की या व्यवस्थेला लोकांच्या प्रश्नांशी काही घेणं-देणं उरलेलं नाही.