चाकरमान्यांचा कोकण प्रवास ‘धोक्याचा’ — प्रशासनाची उडाली झोप

रायगड  : मुंबई-गोवा महामार्गावरील खड्डे, अपूर्ण बायपास, अधांतरी पूल आणि गोंधळलेली वाहतूक व्यवस्था यामुळे सामान्य प्रवासी अक्षरशः हैराण झाले आहेत. वर्षानुवर्षे सुरु असलेल्या या महामार्गाच्या कामाला वेळेचं भान राहिलं नसून ठेकेदारांच्या मनमानीमुळे नागरिकांचे जीव धोक्यात आले आहेत.

या सगळ्या पार्श्वभूमीवर रायगडचे जिल्हाधिकारी किशन जावळे यांनी अखेर कडक भूमिका घेत, राष्ट्रीय महामार्ग प्राधिकरण आणि संबंधित ठेकेदारांना स्पष्ट शब्दांत इशारा दिला आहे — गणेशोत्सवाच्या आधी कामं पूर्ण करा, अन्यथा प्रशासन थेट कारवाई करेल!

बैठकीत जिल्हाधिकाऱ्यांचा इशारा

जिल्हाधिकारी कार्यालयात झालेल्या महामार्ग आढावा बैठकीत जावळे यांनी स्पष्ट शब्दांत सांगितले की,

> “प्रत्येक सणापूर्वी हीच परिस्थिती का? नागरिकांना दरवर्षी खड्डे आणि वाहतूक कोंडीत अडकवायचं ठेकेदारांनी ठरवलंय का? आता ही चालणार नाही.”

ठळक मुद्दे :

महामार्ग खड्डेमुक्त करण्यास तातडीचा आदेश

अपूर्ण पूल व सर्विस रोड ताबडतोब पूर्ण करावेत

दिशादर्शक फलक, रिफ्लेक्टर आणि सुरक्षा जाळ्यांची तातडीने उभारणी

वाहतूक सुरळीत ठेवण्यासाठी ट्रॅफिक वॉर्डन्सची नेमणूक

माणगाव व इंदापूर शहरांत वाहतूक कोंडीतून सुटका करण्याचे स्पष्ट निर्देश

कामांची प्रत्यक्ष तपासणी करूनच मान्यता देण्याचा आदेश

“महामार्ग अपघातमुक्त न केल्यास जबाबदार कोण?” असा थेट सवाल उपस्थित करून जिल्हाधिकाऱ्यांनी प्राधिकरणाला जाब विचारला.

प्रश्नचिन्हांखाली असलेली यंत्रणा :

रस्त्याच्या कामातील अपारदर्शकता, वेळेचे गांभीर्य नसणे, आणि निव्वळ औपचारिक बैठका — यामुळे कोट्यवधींचा प्रकल्प अजूनही अर्धवट आहे. दरवर्षी गणपतीच्या आधीच ‘तात्पुरती डागडुजी’ करण्यात येते आणि सणानंतर सगळं पूर्ववत!

—

🛑 नागरिकांचे सवाल :

एवढा वेळ लागतोय तरी कोणावर कारवाई झाली?

खड्ड्यांचा आणि अपघातांचा हिशोब कोण देणार?

चाकरमानींना त्रास देणाऱ्यांवर कोण झडप घालणार?

—

आता जनता आणि प्रशासन दोघांनाही पुरेसे सहन झालंय! हा महामार्ग पूर्ण करून नागरिकांचा प्रवास सुसह्य करा, अन्यथा रस्त्यावरच प्रश्न विचारले जातील!, असा नागरिकांतून संताप व्यक्त केला जात आहे.