गणेशोत्सवात ट्रक-ट्रेलरना बंदी… पण खड्ड्यांचे साम्राज्य कायम! NHAI–PWD झोपेत, कॉन्ट्रॅक्टर पैसे गिळून बेफिकीर

रायगड : मुंबई–गोवा महामार्गावर अवजड वाहनांना बंदी घालून भाविकांचा मार्ग मोकळा झाला आहे, पण खड्ड्यांचे विघ्न अजूनही तसंच आहे. NHAI, PWD आणि संबंधित कंत्राटदारांचे निकृष्ट काम व ढिम्म गती हीच खरी अडचण आहे.

अब्जावधींची कामं कंत्राटदारांना देऊनही, वर्षानुवर्षं रुंदीकरण हा ‘कोऱ्या कागदावरचा स्वप्नप्रकल्प’ ठरला. अधिकारी केवळ फाईल ढकलण्यात व्यस्त; कंत्राटदार मात्र पैसे गिळून रस्त्यावर डांबराऐवजी डोळ्यात धूळ फेकतायत.

भाविकांना त्रास, वाहनचालकांना अपघाताचा धोका आणि जनतेला कायमचा त्रागा – तरीही जबाबदारांवर कारवाई शून्य! ट्रक-ट्रेलर हटवून प्रशासनाने पाट्या टाकल्या खऱ्या, पण महामार्ग खड्डेमुक्त करणे ही त्यांची खरी जबाबदारी आहे. तोपर्यंत प्रत्येक गाडीखालील धक्का आणि प्रत्येक भाविकाच्या तोंडून येणारी शिवी हा NHAI–PWD आणि कॉन्ट्रॅक्टरांसाठी महाप्रसाद ठरणार आहे.