महावितरणच्या राज्यस्तरीय क्रीडास्पर्धा म्हणजे संघभावनेचा संस्कार — संचालक राजेंद्र पवार

अमरावती : महावितरणच्या राज्यस्तरीय क्रीडा स्पर्धांचे अमरावती येथे भव्य उद्घाटन बुधवारी पार पडले. या स्पर्धा म्हणजे केवळ क्रीडा स्पर्धा नसून कर्मचाऱ्यांमध्ये संघभावना, समन्वय आणि परस्पर विश्वास यांचा संस्कार घडवणारा उपक्रम आहे, असे प्रतिपादन महावितरणचे संचालक (मानव संसाधन) राजेंद्र पवार यांनी उद्घाटन प्रसंगी केले.

हनुमान व्यायाम प्रसारक मंडळाच्या क्रीडा संकुलात पार पडलेल्या या कार्यक्रमाचे अध्यक्षस्थान आयोजन समितीचे अध्यक्ष व मुख्य अभियंता अशोक साळुंके यांनी भूषवले. प्रमुख पाहुणे म्हणून कोकणचे सहव्यस्थापकीय संचालक दिलीप जगदाळे, कार्यकारी संचालक प्रसाद रेशमे, पुणे प्रादेशिक संचालक भुजंग खंदारे, तसेच राज्यातील विविध परिमंडलांतील वरिष्ठ अधिकारी उपस्थित होते.

या राज्यस्तरीय क्रीडास्पर्धेत १६ परिमंडलांचे संयुक्त आठ संघ सहभागी असून, सुमारे ११७० महिला व पुरुष खेळाडू विविध खेळ प्रकारात आपले कौशल्य सादर करत आहेत. खेळाडूंनी संचलन करून पाहुण्यांना मानवंदना दिली. या स्पर्धेचे प्रास्ताविक अशोक साळुंके यांनी केले. सूत्रसंचालन क्षिप्रा मानकर व विजय पांडे यांनी केले, तर आभार प्रदर्शन मधुसूदन मराठे यांनी केले.

या चार दिवसीय स्पर्धेत २२ खेळ प्रकारांचे सामने रंगणार असून, समारोप शनिवार, दि. १५ नोव्हेंबर रोजी होणार आहे.

—

१०० मीटर धावस्पर्धेत प्रिया पाटील आणि गुलाबसिंग वसावे ठरले वेगवान!

अतिशय चुरशीच्या १०० मीटर धावस्पर्धेत पुरुष गटात गुलाबसिंग वसावे (पुणे-बारामती) यांनी सुवर्णपदक पटकावले, तर साईनाथ मसाणे (सांघिक कार्यालय-भांडूप) यांनी रौप्यपदक मिळवले.

महिला गटात प्रिया पाटील (सांघिक कार्यालय-भांडूप) यांनी सुवर्णपदकावर आपली मोहोर उमटवली, तर श्वेतांबरी अंबादे (नागपूर-चंद्रपूर-गोंदिया) यांनी रौप्यपदक जिंकले. विजेत्यांना संचालक राजेंद्र पवार यांच्या हस्ते पारितोषिके प्रदान करण्यात आली.

….