सिंग अलॉंग म्युझिक हब: सूर, सागर आणि देशभक्तीची किनार

सत्यमेव जयते न्यूज डॉट कॉम 

अलिबाग :  स्वातंत्र्यदिनाचा सुवर्णक्षण, तिरंग्याच्या वाऱ्यात डुलणाऱ्या लाटा, आकाशात पसरणारे ढग, आणि कानावर पडणारे देशभक्तीचे सुर… अशीच एक मनाला भिडणारी सुरेल भेट अलिबागच्या सिंग अलॉंग म्युझिक हबने भारतमातेच्या चरणी अर्पण केली.

संतोष ल्हासे यांनी स्थापन केलेल्या या कराओके हबमधील सदस्यांनी, “देशभक्तीच्या गाण्याद्वारे आपल्या भावना व्यक्त कराव्यात” या हेतूने १५ ऑगस्टच्या निमित्ताने एक अनोखा उपक्रम राबवला. मेंबर्सनी स्वतः गायलेले देशभक्तीपर गीत अलिबागच्या निसर्गरम्य ठिकाणी – निळ्याशार समुद्रकिनारी, शांत गोकुळेश्वराच्या परिसरात, आणि हिराकोट तलावाच्या सौंदर्यात – कैद केले गेले.

प्रत्येक सुरात देशप्रेम, प्रत्येक ओळीत मातीचा सुगंध, आणि प्रत्येक दृश्यात आपल्या भूमीची उब – अशा भावस्पर्शी आविष्काराने सजलेला हा व्हिडिओ फेसबुकवर झळकताच हृदय जिंकून गेला. केवळ २४ तासांत १७ हजारांहून अधिक लोकांनी तो पाहिला, तर ५०० हून अधिकांनी आवडीचा ठसा उमटवला.

संतोष ल्हासे यांनी भावुक होत सांगितले, “आमच्या स्वरांमधून आम्ही भारतमातेच्या चरणी वंदन केले आहे. हे आमचे शब्दांत मावणार नाही असे प्रेम, हीच आमची खरी देशसेवा.”

हा उपक्रम केवळ संगीताचा नव्हे, तर अलिबागच्या मातीतील संस्कारांचा, एकतेचा आणि देशभक्तीच्या निखळ भावना जागवणारा सोहळा ठरला.