अलिबाग : छत्रपती शिवाजी महाराज यांच्या इतिहासाचे विकृतीकरण करणाऱ्या ‘खालिद का शिवाजी’ या आगामी चित्रपटावर बंदी घालावी, अशी जोरदार मागणी आज अलिबागमधील शिवप्रेमी नागरिकांनी केली. या मागणीसाठी जिल्हाधिकारी कार्यालयात निवेदन देण्यात आले.
या निवेदनात नमूद करण्यात आले आहे की, चित्रपटाच्या ट्रेलरमध्ये महाराजांच्या विषयी अनेक अनैतिहासिक आणि खोटे दावे करण्यात आले आहेत. त्यामध्ये,
महाराजांच्या सैन्यात ३५% मुसलमान होते,
त्यांच्या अंगरक्षकांपैकी ११ मुसलमान होते,
त्यांनी रायगडावर मशिद बांधली,
तसेच चित्रपटाच्या नावात ‘शिवाजी’ असा एकेरी उल्लेख केला गेला आहे,
या सर्व बाबींमुळे शिवप्रेमी आणि इतिहासप्रेमींच्या भावना दुखावल्या आहेत, असा दावा करण्यात आला आहे.
चित्रपटाच्या माध्यमातून सामाजिक तेढ निर्माण होण्याची शक्यता असून, सार्वजनिक सुव्यवस्थेला धोका निर्माण होऊ शकतो, असेही निवेदनात नमूद करण्यात आले आहे.
मागण्या:
निवेदनात पुढील दोन प्रमुख मागण्या करण्यात आल्या आहेत –
१. रायगड जिल्ह्यातील सर्व चित्रपटगृहांमध्ये सदर चित्रपटाचे प्रदर्शन थांबवण्याबाबत तात्काळ आदेश द्यावेत.
२. चित्रपटाचे निर्माते, लेखक, दिग्दर्शक व संबंधित व्यक्तींवर अपप्रचार, धार्मिक भावना दुखावणे व अफवा पसरवण्याच्या आरोपाखाली कायदेशीर कारवाई करावी.
या निवेदनाची त्वरित दखल घेऊन प्रशासनाने योग्य ती कार्यवाही करावी, अशी मागणी करण्यात आली आहे.
