‘शिकायला गेलो एक’ — एका शिक्षकाच्या जीवनमूल्यांचा भावस्पर्शी प्रवास!

सत्यमेव जयते न्यूज डॉट कॉम

रोहा : “शिकायला गेलो एक हा नाट्यप्रयोग केवळ नाटक नाही, तर शिक्षकाच्या निष्ठा, संघर्ष आणि समर्पणाचा जिवंत प्रवास आहे,” असे खासदार सुनील तटकरे यांनी सहकुटुंब नाटकाचा आनंद घेतल्यानंतर सांगितले.

आज रोह्यातील डॉ. चिंतामणराव द्वा. देशमुख शहर सभागृह (नाट्यगृह) येथे हा प्रयोग सादर झाला. सभागृह खचाखच भरले होते. पडदा उघडताच मंचावर साकार झालेली एका आदर्शवादी शिक्षकाची कहाणी थेट मनाला भिडली.

एका विद्यार्थ्याच्या आयुष्यात सकारात्मक बदल घडवण्यासाठी एक शिक्षक किती समर्पित होतो, त्यासाठी तो किती त्याग करतो आणि आयुष्यभराची निष्ठा कशी जपतो – हे या नाटकातून प्रभावीपणे उलगडले. प्रत्येक प्रसंगाने प्रेक्षकांना विचार करायला भाग पाडले.

“या नाटकाने मनाला स्पर्श केला, विचारांना चालना दिली आणि ‘शिक्षण’ या शब्दामागचं खरं मूल्य काय आहे हे जाणवून दिलं,” असे तटकरे यांनी आवर्जून सांगितले.

कलाकारांचा उत्कट अभिनय, दिग्दर्शकाची संवेदनशील मांडणी आणि सादरीकरणातील वास्तववादाने प्रेक्षकांच्या डोळ्यात पाणी आणले. शिक्षकाची प्रेरणादायी कहाणी अनुभवताना सभागृहात भावनिक वातावरण निर्माण झाले.

रोह्यातील या प्रयोगाने केवळ प्रेक्षकांचे मनोरंजन केले नाही, तर ‘शिक्षण हेच खरे परिवर्तनाचे साधन’ हा संदेश मनावर कोरला.