शेकापला राजकीय पुनरुत्थानासाठी अखेरची संधी? 78व्या वर्धापन दिनी पनवेलमध्ये निर्णायक अधिवेशन; राज ठाकरे उपस्थित

रायगड : पक्ष नेतृत्वाचे चुकलेले राजकीय अंदाज, घरभेदांनी पोखरलेला, सत्तेपासून दूर गेलेला आणि गळतीने उध्वस्त झालेला शेतकरी कामगार पक्ष आज निर्णायक वळणावर उभा आहे. पनवेलमध्ये होत असलेलं ७८वं वर्धापन दिनाचं अधिवेशन हे केवळ एक सोहळा नसून, शेकापच्या राजकीय पुनरुत्थानासाठीची ‘अखेरची संधी’ ठरू शकतं, का हा खरा प्रश्न आहे.

पक्षाला नवसंजीवनी देण्यासाठी खास निमंत्रण देण्यात आले आहे मनसे प्रमुख राज ठाकरे यांना. त्यांच्या भाषणातून पक्षातील मरगळ जाईल, कार्यकर्त्यांमध्ये उत्साह येईल आणि नव्या दमाने लढण्यासाठी प्रेरणा मिळेल, अशी अपेक्षा व्यक्त केली जात आहे.

मात्र प्रश्न कायम आहे — ही फक्त उठावदार उपस्थिती ठरणार? की पक्षाच्या नव्या पर्वाची सुरुवात?

दरम्यान, शेकापचे सरचिटणीस आणि पक्षाचे प्रमुख चेहरा असलेले माजी आमदार जयंत पाटील यांच्यासमोरही स्वतःची राजकीय पुनर्स्थापना करण्याचं मोठं आव्हान आहे. काही वर्षांतील पक्षाच्या चुकीच्या राजकीय भूमिका आणि दिशाहीन निर्णयांबद्दल त्यांनी “राजकीय अंदाज चुकले” अशी उघडपणे कबुली दिली आहे. त्यामुळे या अधिवेशनातून पुढे काय दिशा ठरते, यावर पाटील यांच्या भविष्यातील राजकीय विश्वासार्हतेचीही कसोटी लागणार असल्याचे बोलले जाते.