रायगडचा धुरंदर रणसंग्राम : ‘तटकरे’ फॅक्टर न समजल्याची घातक राजकीय चूक

रायगड जिल्ह्यात सध्या जे काही सुरू आहे, ते केवळ दोन पक्षांमधील वाद नाही. हा संघर्ष आहे सत्तेचा, वर्चस्वाचा आणि राजकीय अस्तित्वाचा. राष्ट्रवादी काँग्रेस (NCP) आणि शिवसेना (शिंदे गट) यांच्यातील संघर्ष आता इतक्या टोकाला पोहोचला आहे की, उपमुख्यमंत्री अजित पवार यांनाही थेट मध्यस्थी करावी लागली. ही बाबच सांगून जाते की, रायगडमधील राजकारण किती धोकादायक पातळीवर पोहोचले आहे.

मंत्री भरत गोगावले आणि उद्योगमंत्री उदय सामंत यांची अजित पवार यांनी घेतलेली बैठक म्हणजे एक प्रकारे “वेळेत आवर घाला” असा स्पष्ट इशाराच होता. त्यानंतर आदिती तटकरे यांच्याशी संवाद साधून वाद वाढू नये, अशी सूचना देणे हे केवळ संयमाचे नव्हे, तर राजकीय वास्तवाचे भान ठेवण्याचे लक्षण आहे. मात्र प्रश्न कायम आहे की,

हा संघर्ष थांबवायचा तरी कोणासाठी? आणि का?

रायगडच्या राजकारणात एक कटू पण निर्विवाद सत्य आहे. सुनील तटकरे यांच्या शिवाय जिल्ह्यात राजकीय, प्रशासकीय किंवा सामाजिक पानही हलत नाही. हे विधान अतिशयोक्ती नसून इतिहासाने सिद्ध केलेली वस्तुस्थिती आहे. गेल्या अनेक दशकांपासून तटकरे यांनी जिल्ह्याची राजकीय नाडी, प्रशासनाची दोरी आणि सत्तेची श्वासवाहिनी आपल्या हातात ठेवली आहे. जो कोणी तटकरे यांना हलक्यात घेतो, तो इतिहासात “एक होता नेता” म्हणूनच नोंदवला जातो, असे म्हटले तर वावगे ठरणार नाही.

माजी मुख्यमंत्री बॅरिस्टर ए. आर. अंतुले यांच्यासारखा दिग्गज नेता असो, अशोक साबळे, माणिक जगताप किंवा मधुशेठ ठाकूर असोत सर्वांनी कधी ना कधी तटकरे यांच्याशी राजकीय वैर घेतले.त्यानंतर त्यांच्या राजकीय कारकीर्दीला कधी उतरण लागली, हे त्यांनाही कळले नाही. अगदी अलीकडच्या काळात जयंत पाटील यांचा विधान परिषदेचा मार्ग बंद झाल्याची चर्चा असो, रायगडमध्ये सत्तेच्या चाव्या कुणाकडे आहेत, हे पुन्हा एकदा स्पष्ट झाले.