मोबाईलच्या दुनियेतून थेट इतिहासाच्या रणांगणात… कुरुळमध्ये उलगडली भारताच्या खेळसंस्कृतीची आणि शिवशौर्याची जिवंत शाळा

अलिबाग : आजची पिढी मोबाईल, व्हिडीओ गेम्स आणि स्क्रीनमध्ये अडकलेली असताना, भारतीय खेळसंस्कृती आणि शिवकालीन पराक्रमाचा थेट अनुभव देणारे एक वेगळेच चित्र आज कुरुळमध्ये पाहायला मिळाले.

सुएसो माध्यमिक विद्यालय, कुरुळ येथे ३० डिसेंबर २०२५ रोजी आयोजित करण्यात आलेल्या या प्रदर्शनाने इतिहास हा फक्त अभ्यासक्रम नसून जगण्याची ऊर्जा आहे हे ठसठशीतपणे मांडले.

आपला कट्टा, नवी मुंबई संस्थेच्या पुढाकारातून साकारलेल्या या उपक्रमात मांडलेले पुरातन भारतीय बैठ्या खेळ हे केवळ करमणुकीचे साधन नाहीत, तर युद्धतंत्राचे प्रशिक्षण, सांघिक निर्णयक्षमता, शारीरिक व मानसिक शिस्त, स्वसंरक्षणाची जाणीव यांचा मूळ पाया आहेत, हे प्रत्यक्ष अनुभवातून समोर आले.

हेच खेळ कधी काळी गडकिल्ल्यांवर, लेण्यांत आणि रणांगणात योद्धे घडवत होते आणि आज तेच खेळ नव्या पिढीला पुन्हा मुळांकडे नेण्याचे काम करत आहेत.

प्रदर्शनात ठेवलेली शिवकालीन दुर्मिळ शस्त्रे, ऐतिहासिक नाणी आणि महाराष्ट्रातील गडकिल्ल्यांची छायाचित्रे पाहताना अनेक विद्यार्थी थक्क झाले. इतिहासाच्या पुस्तकातील पाने येथे लोखंड, दगड आणि छायाचित्रांच्या रूपात जिवंत झाल्याचे चित्र दिसून आले.

इतिहास पाहण्याचा नव्हे, जाणवण्याचा अनुभव

या उपक्रमातून “इतिहास बघायचा नाही, तो जगायचा असतो” हा संदेश ठळकपणे पुढे आला.

आज सकाळी ११ ते सायंकाळी ५ या वेळेत सुरू असलेल्या या प्रदर्शनाला विद्यार्थी, पालक आणि नागरिकांनी मोठ्या संख्येने भेट देत आहेत.

यावेळी बोलताना ॲड. प्रसाद पाटील, अध्यक्ष, स्थानिक व्यवस्थापन समिती, सु ए सो विद्यालय, कुरुळ यांनी सांगितले की, “आपली परंपरा, खेळसंस्कृती आणि शिवकालीन शौर्य नव्या पिढीपर्यंत पोहोचले, तरच सक्षम आणि राष्ट्राभिमानी समाज घडेल.”

दरम्यान, डिजिटल युगात इतिहासाची मशाल पेटवणारा हा उपक्रम कुरुळसाठीच नव्हे, तर संपूर्ण समाजासाठी प्रेरणादायी ठरत आहे.