“मेक अमेरिका ग्रेट अगेन’ की ‘मेक इस्रायल ग्रेट’? – ज्येष्ठ पत्रकार  रिक सांचेझ यांचा ट्रम्पवर हल्लाबोल”

अमेरिकेच्या सध्याच्या परराष्ट्र धोरणावर जगभरातून टीका होत असताना आता ज्येष्ठ पत्रकार रिक सांचेझ यांनीही डोनाल्ड ट्रम्प यांच्या धोरणांवर कठोर शब्दांत हल्लाबोल केला आहे. सांचेझ यांच्या मते, ट्रम्प यांच्या गोंधळात टाकणाऱ्या आणि परस्परविरोधी धोरणांमुळे अमेरिका आपले जागतिक धोरणात्मक स्थान गमावत आहे, तर प्रतिस्पर्धी देश एकत्र येऊ लागले आहेत.

सांचेझ म्हणाले, “ट्रम्प कधी प्रेमळ भाषेत बोलतात, तर दुसऱ्या दिवशी ते आक्रमक सूर लावतात. त्यामुळे अनेक देशांमध्ये संभ्रम निर्माण झाला आहे. त्यावर प्रतिक्रिया द्यायची की दुर्लक्ष करायचे, याबाबतच अनिश्चितता आहे.”

त्यांनी पुढे म्हटले, “खरे व्यापारी कधीच बाजारपेठेला गोंधळात टाकत नाहीत. पण अमेरिकेच्या भूमिकेमुळे तिचे पारंपरिक मित्र नवे पर्याय शोधत आहेत. चीन भारताकडे हात पुढे करत आहे आणि सांगत आहे की अमेरिका अविश्वसनीय आहे, पण आम्ही तुमच्यासोबत आहोत.”

सांचेझ यांनी वादग्रस्त विधान करताना स्पष्ट केले की आता अमेरिका जगातील सर्वात शक्तिशाली देश नाही. “इस्रायल हवे तेव्हा अमेरिका त्याच्या सांगण्यावर वागत असते,” असे ते म्हणाले. ट्रम्प यांच्या ‘मेक अमेरिका ग्रेट अगेन’ मोहिमेला साथ देणारे अनेक लोकदेखील आता विरोधी मत व्यक्त करत असून, अमेरिका नव्हे तर इस्रायलला प्राधान्य दिले जात असल्याची नाराजी व्यक्त करत आहेत.