मुंबईनंतर एमसीएची नजर रायगडवर? क्रिकेट स्पर्धेमुळे स्थानिक अर्थचक्रालाही चालना

अलिबाग | 

महाराष्ट्र क्रिकेट असोसिएशनच्या वतीने आयोजित करण्यात येणाऱ्या प्रौढ गटातील दोन दिवसीय क्रिकेट सामन्यांचे आयोजन यंदा रायगड जिल्ह्यातील विविध मैदानांवर करण्यात आले असून, या निमित्ताने रायगड केवळ स्पर्धेचे यजमान ठरत नसून भविष्यातील क्रिकेट केंद्र म्हणून पुढे येत असल्याचे संकेत मिळत आहेत.
पेण येथील छत्रपती शिवाजी महाराज क्रिकेट मैदान, नागोठणे रिलायन्स मैदान, रसायनी पाताळगंगा येथील नॅशनल इन्स्टिट्यूट ऑफ सिक्युरिटी मार्केट्स मैदान तसेच गव्हाण उलवे येथील छत्रपती शिवाजी महाराज मैदानावर सामने रंगणार आहेत. ग्रुप ‘डी’ मध्ये रायगड जिल्हा क्रिकेट असोसिएशनसह नाशिक जिल्हा क्रिकेट असोसिएशन, वायएमसीए क्रिकेट क्लब, सीडीए क्रिकेट क्लब पुणे, सीओएम क्रिकेट क्लब पुणे व सेंट्रल झोन असे सहा संघ सहभागी होत असून साखळी फेरीतील एकूण १५ दोन दिवसीय सामने खेळवले जाणार आहेत.

मैदानांबरोबरच अर्थकारणही गतीमान

बाहेरील संघ, प्रशिक्षक व अधिकाऱ्यांच्या आगमनामुळे मुक्काम, खानावळी, स्थानिक वाहतूक, पाणीपुरवठा, मैदान कर्मचारी आदी सेवांना मोठी मागणी निर्माण झाली आहे. त्यामुळे क्रिकेट स्पर्धेमुळे जिल्ह्यातील स्थानिक व्यावसायिकांना थेट आर्थिक फायदा होणार असून ग्रामीण भागात क्रीडा-आधारित अर्थचक्राला चालना मिळणार आहे.

मुंबई-पुण्याबाहेर क्रिकेट विस्ताराचा संकेत?

मुंबई व पुण्यातील मैदानांची मर्यादित उपलब्धता लक्षात घेता एमसीए आता जिल्हा पातळीवरील दर्जेदार मैदानांकडे वळत असल्याचे चित्र या स्पर्धेतून दिसत आहे. प्रमाणित पंच व गुणलेखक रायगडमधूनच काम पाहणार असल्याने प्रशासनिक पातळीवरही जिल्ह्याचा दर्जा वाढत आहे. भविष्यात ट्रायल्स, कॅम्प किंवा मोठ्या स्पर्धांचे आयोजन जिल्ह्यात होण्याची शक्यता व्यक्त केली जात आहे.
रायगड जिल्हा क्रिकेट असोसिएशनचे अध्यक्ष अनिरुद्ध पाटील व सचिव प्रदीप नाईक यांनी सर्व पदाधिकारी व सदस्य स्पर्धेच्या यशस्वी आयोजनासाठी प्रयत्नशील असल्याचे सांगितले. तसेच जिल्ह्यातील क्रिकेटप्रेमींनी मैदानावर उपस्थित राहून सामने अनुभवावेत, असे आवाहन करण्यात आले आहे.

रायगड जिल्हा क्रिकेट आता स्थानिक स्पर्धांपुरता मर्यादित न राहता राज्य क्रिकेटच्या मुख्य प्रवाहात प्रवेश करत असल्याचे चित्र दिसत आहे. एमसीएच्या दोन दिवसीय स्पर्धांचे आयोजन ही केवळ एक स्पर्धा नसून जिल्ह्यातील क्रिकेट पायाभूत सुविधांना मिळालेली मान्यता मानली जात आहे.

जिल्ह्यातील प्रमाणित मैदानं, प्रशिक्षित पंच-गुणलेखक आणि संघटनात्मक तयारी यामुळे रायगडची ओळख “क्रिकेट आयोजनक्षम जिल्हा” म्हणून निर्माण होत आहे. याचा थेट फायदा स्थानिक खेळाडूंना होणार असून मोठ्या संघांविरुद्ध खेळण्याची तसेच निवड समितीच्या नजरेत येण्याची संधी वाढणार आहे.

तज्ज्ञांच्या मते, अशा स्पर्धा सातत्याने झाल्यास भविष्यात जिल्ह्यात राज्यस्तरीय कॅम्प, ट्रायल्स किंवा मोठ्या स्पर्धांचे आयोजन होण्याची शक्यता असून रायगड क्रिकेट नकाशावर ठळकपणे उमटण्याच्या मार्गावर आहे.