प्रशासकीय राजवट खालसा होणार ! 12 मार्चला शिवतीर्थावर लोकशाहीचे राज्य 

रायगड जिल्हा परिषदेसाठी 12 मार्च रोजी अध्यक्ष आणि उपाध्यक्ष पदाची निवड होणार असून गेली साडेतीन वर्षे शिवतीर्थावर बसलेली प्रशासनाची राजवट अखेर खालसा होणार आहे. निवडून आलेल्या लोकप्रतिनिधींच्या माध्यमातून आता जिल्हा परिषदेत नव्या सत्ताधाऱ्यांची अधिकृत एंट्री होणार असून सत्तेचा कारभार पुन्हा जनतेच्या प्रतिनिधींच्या हाती जाणार आहे.

गेल्या साडेतीन वर्षांच्या कालावधीत प्रशासकीय कारभारात विकासकामांबाबत कोणते निर्णय घेण्यात आले, विविध योजनांसाठी किती निधी मंजूर झाला आणि त्याचा प्रत्यक्षात कसा विनियोग करण्यात आला, याचा आढावा नव्या सत्ताधाऱ्यांकडून घेतला जाण्याची शक्यता व्यक्त होत आहे.
या कालावधीत ग्रामीण भागाच्या विकासासाठी राज्य सरकारकडून कोट्यवधी रुपयांचा निधी उपलब्ध करून देण्यात आला होता. त्याचप्रमाणे जिल्हा नियोजन समितीमार्फतही मोठ्या प्रमाणावर निधी जिल्हा परिषदेकडे वर्ग करण्यात आला होता. त्यामुळे या निधीचा वापर कोणत्या योजनांवर, कोणत्या कामांसाठी आणि किती प्रमाणात झाला, याची सविस्तर छाननी होण्याची शक्यता नाकारता येत नाही.
नव्या नेतृत्वाकडून प्रशासकीय काळातील निर्णयप्रक्रिया, खर्चाची पारदर्शकता आणि कामांची गुणवत्ता यावरही प्रकाश टाकला जाऊ शकतो, अशी चर्चा राजकीय वर्तुळात सुरू आहे.