रायगड : मुरुड-कोरलई किनाऱ्यावरून बेपत्ता झालेल्या पाकिस्तानी बोयाचा अखेर शोध लागला आहे. रायगड पोलीस दलाने अरबी समुद्रात राबवलेल्या सर्च ऑपरेशनमध्ये हा बोया शुक्रवारी सायंकाळी साडेपाच वाजता रेवदंडा- आंग्रेनगर येथे सापडला, अशी माहिती पोलीस सूत्रांनी दिली. पाच दिवसांपासून सुरू असलेल्या शोध मोहिमेनंतर सुरक्षा यंत्रणांनी सुटकेचा निश्वास टाकला आहे.
सदर घटना ६ जुलैच्या रात्री घडली होती. कोर्लई किल्ल्याजवळ ‘Muqadar Boya 99’ (MMSI: 463800411) नावाची एक संशयास्पद बोट दिसून आली होती. ही बोट पाकिस्तानातून आली असावी, अशी शक्यता वर्तवण्यात आली होती. तटरक्षक दल, भारतीय नौदल आणि केंद्र सरकारच्या सुरक्षा यंत्रणांकडून तातडीने माहिती मिळाल्यानंतर स्थानिक पोलीस सतर्क झाले.
या बोटीत कोणीही आढळले नव्हते, मात्र तिची उपस्थिती संशयास्पद होती. पुढील तपासात हे लक्षात आले की ती वस्तू प्रत्यक्षात एक बोया (समुद्रमार्ग दर्शवणारा चिन्ह) आहे. मात्र, बोया बेपत्ता झाल्याने तपास यंत्रणांची चिंता वाढली होती.
पाच दिवसांपासून सुरू असलेल्या शोधमोहीमेत अखेर रायगड पोलिसांच्या सतर्कतेमुळे हा बोया रेवदंडा परिसरात आढळून आला. दरम्यान, तटरक्षक दल, नौदल आणि पोलीस प्रशासनाने संयुक्तरित्या सर्च व कोंबिंग ऑपरेशन राबवत परिस्थितीवर बारकाईने लक्ष ठेवले होते.
या घटनेनंतर कोकण किनारपट्टीवरील सुरक्षा व्यवस्थेचा आढावा घेण्याची गरज अधोरेखित झाली आहे. समुद्रमार्गे घडणाऱ्या घुसखोरीसारख्या घटनांवर सतत नजर ठेवणे ही काळाची गरज असल्याचे जाणकारांचे मत आहे.
